bipolar

1

shahr-e-jāñ

aaj vīrān hai

jaise gahrī siyah raat ho

dard kī tez āñdhī meñ saare diye bujh ga.e

har taraf tīrgī

ek jugnū bhī baaqī nahīñ

bas añdheroñ kī dīvār hai

yaas ke dasht meñ

nā-rasā.ī kī yalġhār hai

hasrat-o-ġham kī zanjīr hiltī hai jhankār hai

koī mūnis nahīñ

zindagī baar hai

2

sub.h-dam

yak-ba-yak

jaise jaadū nagar

saarā manzar badalne lagā

ek shīshe kā piñjra ki merī anā-gīr nazroñ ke mantar kī hiddat se

jaise pighalne lagā

phir chhanāke se TuuTā mire sāmne

ab to ehsās kī sab fasīloñ se bāhar

mirā asp-e-tāzī vafādār hai

aur murādoñ kā ik dilrubā qartaba sāmne mere tayyār hai

aaj maiñ hī sikandar huuñ aur

aaj mere hī dast-e-junūñ meñ chamaktī huī ek talvār hai

1

shahr-e-jaan

aaj viran hai

jaise gahri siyah raat ho

dard ki tez aandhi mein sare diye bujh gae

har taraf tirgi

ek jugnu bhi baqi nahin

bas andheron ki diwar hai

yas ke dasht mein

na-rasai ki yalghaar hai

hasrat-o-gham ki zanjir hilti hai jhankar hai

koi munis nahin

zindagi bar hai

2

subh-dam

yak-ba-yak

jaise jadu nagar

sara manzar badalne laga

ek shishe ka pinjra ki meri ana-gir nazron ke mantar ki hiddat se

jaise pighalne laga

phir chhanake se TuTa mere samne

ab to ehsas ki sab fasilon se bahar

mera asp-e-tazi wafadar hai

aur muradon ka ek dilruba qartaba samne mere tayyar hai

aaj main hi sikandar hun aur

aaj mere hi dast-e-junun mein chamakti hui ek talwar hai