bisat-e-KHun-chakan

ye pyāde piT chuke haiñ sab

tumhāre feel aur asp-e-yazīdī

ḳhāna-ba-ḳhāna pareshāñ

parda-ba-parda pashemāñ

lā-ba-lā jā-e-mafar kī rah meñ sargardāñ

bisāt-e-ḳhūñ-chakāñ par

ret kī dīvār niklā har bahādur

aur ab atrāf meñ shah ke

koī ḳhandaq hai aur

na koī dasta hai hifāzat kā

vazīr-e-mohtaram kā ḳhāna ḳhālī hai

bisāt-e-ḳhūñ-chakāñ par

har bahādur ghuTne Teke

apne ḳhāne meñ pareshāñ sar jhukā.e

haath siine se lagā.e

ālam-e-hairat se ik duuje ko taktā hai

tamāshā.ī khaḌe chup-chāp

patthar lab liye aur saañs roke

bāzī-e-shatranj par nazreñ jamā.e

mahv-e-manzar haiñ

ye manzar ḳhuub manzar hai ki jis meñ

nā-tavāñ hāthoñ ne zor-āvar kā nashsha

ek lamhe meñ utārā hai

ye pyāde piT chuke haiñ

aur tumhāre fiil aur asp-e-yazīdī

ab yahāñ sar-ba-garebāñ haiñ

vazīr-e-mohtaram kā ḳhāna ḳhālī hai

bisāt-e-ḳhūñ-chakāñ par

maat hone meñ

bas ik ḳhāne kī duurī hai

ye pyaade piT chuke hain sab

tumhaare feel aur asp-e-yazidi

KHana-ba-KHana pareshan

parda-ba-parda pasheman

la-ba-la ja-e-mafar ki rah mein sargardan

bisat-e-KHun-chakan par

ret ki diwar nikla har bahadur

aur ab atraf mein shah ke

koi KHandaq hai aur

na koi dasta hai hifazat ka

wazir-e-mohtaram ka KHana KHali hai

bisat-e-KHun-chakan par

har bahadur ghuTne Teke

apne KHane mein pareshan sar jhukae

hath sine se lagae

aalam-e-hairat se ek duje ko takta hai

tamashai khaDe chup-chap

patthar lab liye aur sans roke

bazi-e-shatranj par nazren jamae

mahw-e-manzar hain

ye manzar KHub manzar hai ki jis mein

na-tawan hathon ne zor-awar ka nashsha

ek lamhe mein utara hai

ye pyaade piT chuke hain

aur tumhaare fil aur asp-e-yazidi

ab yahan sar-ba-gareban hain

wazir-e-mohtaram ka KHana KHali hai

bisat-e-KHun-chakan par

mat hone mein

bas ek KHane ki duri hai