bisat

ik bisāt-e-vujūd-o-badan ke tahat

sālhā-sāl tak

ham se 'uryāniyat kā 'ajab khel khelā gayā

ham shikasta rahe

tum azal se ġhalat chaal chalte rahe

ham tumhārī zahānat sarāhā kiye

tum hamāre sabhī falsafe jism ke zāviyoñ par parakhte rahe

tum to dast-e-hunar kā tarāshīda fan chhoḌ kar

us kī angusht-e-maḳhrūt ke ḳhāl-o-ḳhat se ulajhte rahe

aur ḳhayālāt ke poroñ se lipTā bebas qalam

chīḳhtā rah gayā

ibn-e-ādam kī ye fitrī majbūriyāñ

aapsī ranjishoñ ke ta.iiñ

biich bāzār meñ apnī maaoñ ko tum ne barahna kiyā

apnī bahnoñ ke sar se ridā noch lī

aur jīvan ke kamzor lamhāt meñ

jo qabā.eñ tumhāre liye aasrā thiiñ vo sab

kuchh khanakte hue qahqahoñ ke 'evaz

chā.e-ḳhānoñ kī mezoñ pe nīlām kiiñ

raah chalte ġhalāzat bhare fiqre kaste rahe

mo'tabar baiThakoñ meñ najāsat parosī ga.ī

ham ko nā-kardagī kī sazā dī ga.ī

aur tumhārī talāfī ko jarge bulā.e ga.e

āḳhirash

tīrgī jab ujāle nigalne lagī

tāqchoñ meñ saje

phir tumhāre vadī'at-shuda

ye nazākat ke saare diye

apne siine kī ātish se raushan kiye

aur tumhāre taqāzoñ ke madd-e-nazar

ham ne bistar kī shiknoñ se misre chune

dekho ye khel kī āḳhirī chaal hai

harf ko jism bante hue dekh lo

merī nazmoñ kī doshīzgī kī qasam

in meñ maujūd lafzoñ kā 'uryāñ badan

dastaras se pare

aur dast-e-taḳhayyul se bhī duur hai

so tumhārī ye zillat bharī bebasī dekh kar

intiqāmī badan kā har ik resha resha baḌī zor se

qahqahe maar ke hans paḌā

ek bisat-e-wujud-o-badan ke tahat

salha-sal tak

hum se 'uryaniyat ka 'ajab khel khela gaya

hum shikasta rahe

tum azal se ghalat chaal chalte rahe

hum tumhaari zahanat saraha kiye

tum hamare sabhi falsafe jism ke zawiyon par parakhte rahe

tum to dast-e-hunar ka tarashida fan chhoD kar

us ki angusht-e-maKHrut ke KHal-o-KHat se ulajhte rahe

aur KHayalat ke poron se lipTa bebas qalam

chiKHta rah gaya

ibn-e-adam ki ye fitri majburiyan

aapsi ranjishon ke tain

bich bazar mein apni maon ko tum ne barahna kiya

apni bahnon ke sar se rida noch li

aur jiwan ke kamzor lamhat mein

jo qabaen tumhaare liye aasra thin wo sab

kuchh khanakte hue qahqahon ke 'ewaz

chae-KHanon ki mezon pe nilam kin

rah chalte ghalazat bhare fiqre kaste rahe

mo'tabar baiThakon mein najasat parosi gai

hum ko na-kardagi ki saza di gai

aur tumhaari talafi ko jarge bulae gae

aaKHirash

tirgi jab ujale nigalne lagi

taqchon mein saje

phir tumhaare wadi'at-shuda

ye nazakat ke sare diye

apne sine ki aatish se raushan kiye

aur tumhaare taqazon ke madd-e-nazar

hum ne bistar ki shiknon se misre chune

dekho ye khel ki aaKHiri chaal hai

harf ko jism bante hue dekh lo

meri nazmon ki doshizgi ki qasam

in mein maujud lafzon ka 'uryan badan

dastaras se pare

aur dast-e-taKHayyul se bhi dur hai

so tumhaari ye zillat bhari bebasi dekh kar

intiqami badan ka har ek resha resha baDi zor se

qahqahe mar ke hans paDa