black-out ki aaKHiri raat

ab ham jaan ga.e haiñ ki añdhere hamārā muqaddar nahīñ the

balki tum ne shahr kī tamām strēt-lights bujhā dī thiiñ

hamārā frustration tumhārī makkārī hai ki ham se mohabbat aur jins kī

sachchī masarrateñ chhīn kar tum ne hameñ blue-film kā aadī banā diyā

hamāre hashīsh bhare sigreToñ kā dhuāñ tumhārī mashīnoñ ke azaab

aur miloñ kī chimniyoñ se nikalne vaale zahr kā natīja hai

lekin ab zahr tumhārā muqaddar hogā ki ham tavānā.ī ke saath zinda rahne kā gur jaan ga.e haiñ

ab ham continent ke ḳhuñḳhār bheḌiyoñ aur siberia ke

barfānī rīchhoñ se nahīñ Darte jinhoñ ne puurī duniyā ko naazī camp banā diyā thā

ab hameñ in masḳhare totoñ kī dānishvarī nahīñ chāhiye jo hazāroñ

saal kī raTī-raTā.ī bāteñ dohrā kar hameñ ilm ke naam par bevaqūf banā rahe the

plato bahut baḌā aadmī thā phir bhī apne daur kī republican ham ḳhud likheñge

ham ma.asūm bachche haiñ magar hamāre khilaune toḌ kar tum ne hameñ gāliyāñ dene par majbūr kar diyā

kal ham picnic manāte manāte magarmachh ke muñh meñ chale ga.e the

lekin aaj pāniyoñ par aag lagā kar tairte rahne kā fan siikh chuke haiñ

kal ham tum se baat karte Darte the lekin aaj

ḳhudā se hot-line par guftugū kar rahe haiñ

agar tum rockitoñ par baiTh kar bhagoḌoñ kī tarah chāñd aur mirrīḳh kī taraf

jaanā chāhte ho to jaao hameñ hamārī zamīn aur aane vaalā zamāna chāhiye

raat fāhisha aurat thī jo tumhāre saath soī rahī

lekin ab din nikal chukā hai aur us kā raushan sūraj

añdheroñ black-out aur fāhisha auratoñ ke liye maut kī alāmat hai

ab hum jaan gae hain ki andhere hamara muqaddar nahin the

balki tum ne shahr ki tamam street-lights bujha di thin

hamara frustration tumhaari makkari hai ki hum se mohabbat aur jins ki

sachchi masarraten chhin kar tum ne hamein blue-film ka aadi bana diya

hamare hashish bhare sigreTon ka dhuan tumhaari mashinon ke azab

aur milon ki chimniyon se nikalne wale zahr ka natija hai

lekin ab zahr tumhaara muqaddar hoga ki hum tawanai ke sath zinda rahne ka gur jaan gae hain

ab hum continent ke KHunKHar bheDiyon aur siberia ke

barfani richhon se nahin Darte jinhon ne puri duniya ko nazi camp bana diya tha

ab hamein in masKHare toton ki danishwari nahin chahiye jo hazaron

sal ki raTi-raTai baaten dohra kar hamein ilm ke nam par bewaquf bana rahe the

plato bahut baDa aadmi tha phir bhi apne daur ki republican hum KHud likhenge

hum masum bachche hain magar hamare khilaune toD kar tum ne hamein galiyan dene par majbur kar diya

kal hum picnic manate manate magarmachh ke munh mein chale gae the

lekin aaj paniyon par aag laga kar tairte rahne ka fan sikh chuke hain

kal hum tum se baat karte Darte the lekin aaj

KHuda se hot-line par guftugu kar rahe hain

agar tum rockiton par baiTh kar bhagoDon ki tarah chand aur mirriKH ki taraf

jaana chahte ho to jao hamein hamari zamin aur aane wala zamana chahiye

raat fahisha aurat thi jo tumhaare sath soi rahi

lekin ab din nikal chuka hai aur us ka raushan suraj

andheron black-out aur fahisha auraton ke liye maut ki alamat hai