blind followers

maiñ aaj tum se muḳhātib huuñ mere ham-vatano

ki tab'-e-shikva-e-ġham aaj kuchh ziyāda hai

mizāj apnā tunuk-zarf to nahīñ lekin

vatan meñ zor-e-sitam aaj kuchh ziyāda hai

maiñ aaj tum se muḳhātib huuñ yuuñ ki dekhtā huuñ

tumhāre paañv khule haiñ magar dimāġh asiir

tum apnī āñkhoñ pe rangīn paTTiyāñ bāñdhe

gharoñ se uThte dhueñ ko batā rahe ho ‘abīr

machā ke gul koī imdād to nahīñ karte

bahut 'azīz sahī tum ko sarzamīñ apnī

jab aaj top nahīñ zehn raaj karte haiñ

tumhāre paas koī soch hī nahīñ apnī

maiñ aaj tum se muḳhātib huuñ yuuñ ki Dartā huuñ

kisī ke kahne pe tum log zahr khā loge

kisī ke Tokne pe ghar kī vus'atoñ ke liye

tum apne sahn ke sab peḌ kaaT Dāloge

maiñ aaj tum se muḳhātib huuñ yuuñ ki jāntā huuñ

tumhārī nafratoñ kā chhor lā-shu'ūrī nahīñ

jhulaste jism jinheñ tum alaav karte ho

tumhāre ghar na jalā.eñ koī zarūrī nahīñ

sitāra jis ke ta'āqub meñ laḌte-bhiḌte ho

kahīñ vo TuuT ke āñkhoñ meñ hī na gaḌ jaa.e

jo tum ko dūsroñ kī bebasī pe aatī hai

usī hañsī pe pashemāñ na honā paḌ jaa.e

savāl-e-fāqa-o-malbūs pūchhne pe vo log

majāzī ḳhvāb kī tasvīr pesh karte haiñ

tumheñ pata hai jinheñ tum ḳhudā samajhte ho

tumhāre sochne aur bolne se Darte haiñ

koī bhī zulm kare us pe e'tirāz karo

ki e'tirāz baġhāvat nahīñ hifāzat hai

ki e'tirāz gavāhī hai zinda hone kī

ki e'tirāz musāvāt kī 'alāmat hai

ai mere pyāre vatan-vāsiyo ḳhudā ke liye

dil-o-dimāġh tum apnā zarā kushāda karo

ujālā kahne se pahle tum us ko dekh to lo

diyoñ meñ aag lagā dī ga.ī hai be-ḳhabaro

main aaj tum se muKHatib hun mere ham-watano

ki tab'-e-shikwa-e-gham aaj kuchh ziyaada hai

mizaj apna tunuk-zarf to nahin lekin

watan mein zor-e-sitam aaj kuchh ziyaada hai

main aaj tum se muKHatib hun yun ki dekhta hun

tumhaare panw khule hain magar dimagh asir

tum apni aankhon pe rangin paTTiyan bandhe

gharon se uThte dhuen ko bata rahe ho ‘abir

macha ke gul koi imdad to nahin karte

bahut 'aziz sahi tum ko sarzamin apni

jab aaj top nahin zehn raj karte hain

tumhaare pas koi soch hi nahin apni

main aaj tum se muKHatib hun yun ki Darta hun

kisi ke kahne pe tum log zahr kha loge

kisi ke Tokne pe ghar ki wus'aton ke liye

tum apne sahn ke sab peD kaT Daloge

main aaj tum se muKHatib hun yun ki jaanta hun

tumhaari nafraton ka chhor la-shu'uri nahin

jhulaste jism jinhen tum alaw karte ho

tumhaare ghar na jalaen koi zaruri nahin

sitara jis ke ta'aqub mein laDte-bhiDte ho

kahin wo TuT ke aankhon mein hi na gaD jae

jo tum ko dusron ki bebasi pe aati hai

usi hansi pe pasheman na hona paD jae

sawal-e-faqa-o-malbus puchhne pe wo log

majazi KHwab ki taswir pesh karte hain

tumhein pata hai jinhen tum KHuda samajhte ho

tumhaare sochne aur bolne se Darte hain

koi bhi zulm kare us pe e'tiraaz karo

ki e'tiraaz baghawat nahin hifazat hai

ki e'tiraaz gawahi hai zinda hone ki

ki e'tiraaz musawat ki 'alamat hai

ai mere pyare watan-wasiyo KHuda ke liye

dil-o-dimagh tum apna zara kushada karo

ujala kahne se pahle tum us ko dekh to lo

diyon mein aag laga di gai hai be-KHabaro