بول ناں

تو شاہ مرے لفظوں کا ہے

تو حسن ہے میری نظموں کا

میں پاگل تیری چاہت میں

سائیں میں کتنی گھائل ہوں

تم دیکھو میری آنکھوں میں

ہو تم ہی میرے اشکوں میں

میں من کے بھید بتاؤں کیا

کس طرح پیار چھپاؤں میں

میں لاکھ چھپاؤں دنیا سے

آنکھوں میں سب آ جاتا ہے

تو دل سے مجھے دعائیں دے

تجھ پہ نچھاور میری وفائیں

پیار کی خوشبو من میں بسی ہے

پیاس تو لیکن لب پہ سجی ہے

اسے نکالوں من سے کیسے

تجھے نکالوں تن سے کیسے

خواب کی کرچی چبھتی جائے

اشک مرے رخسار پہ آئے

ٹوٹ گیا منت کا دھاگہ

من میرا ہے کتنا ابھاگا

خواب کی آس میں کھویا سب کچھ

ڈوب گیا ہے پیاس میں سب کچھ

آنکھوں میں ویرانی اتری

چہرے پر حیرانی اتری

کیسے مناؤں ماتم سائیں

بول ناں میرے ہمدم سائیں

دے دے سائیں مجھ کو دعا تو

یا تو آکر خود دفنا تو