bolta kyun nahin

tū ne kyuuñ apne gāloñ pe sarsoñ malī

tū ne kyuuñ apnī āñkhoñ meñ chūnā bharā

terī goyā.ī kis dasht ke bheḌiye le ga.e

boltā kyuuñ nahīñ

boltā kyuuñ nahīñ tifl-e-māsūm to kab se bīmār hai

kaisā āzār hai jis ne terī shaboñ se tirī niiñd tere dinoñ se

khilaune churā.e

tū soyā nahīñ hai magar jāgtā kyuuñ nahīñ

dekhtā kyuuñ nahīñ tere baabā ke bāloñ meñ khujlī hai aur uñgliyāñ jhaḌ chukī haiñ

hisāb-e-shab-o-roz karte hue

terī ammāñ ke ra.asha-zada haath ḳhush-hāliyāñ DhūñDte DhūñDte

in dhule bartanoñ meñ paḌe rah ga.e

sub.h-e-tābīr ne shāḳh par sabz hone kī hasrat likhī

aañkh ko motiyā de diyā

dekhtā kyuuñ nahīñ aaj bāzār meñ jashn-e-iflās hai

shahr kī bhuuk chorī huī

aur ḳhabroñ ne aḳhbār gum kar diyā

log rote rahe

log hañste rahe

tere bistar pe ashkoñ kī champā khilī

aur tū chup rahā

tere māthe pe muskān kā itr chhiḌkā gayā

aur tū chup rahā

merī hañDiyā jalī

merā chūlhā bujhā

merī jholī se harf-e-duā gir gayā

mere bachche tū lab kholtā kyuuñ nahīñ

boltā kyuuñ nahīñ

tu ne kyun apne galon pe sarson mali

tu ne kyun apni aankhon mein chuna bhara

teri goyai kis dasht ke bheDiye le gae

bolta kyun nahin

bolta kyun nahin tifl-e-masum to kab se bimar hai

kaisa aazar hai jis ne teri shabon se teri nind tere dinon se

khilaune churae

tu soya nahin hai magar jagta kyun nahin

dekhta kyun nahin tere baba ke baalon mein khujli hai aur ungliyan jhaD chuki hain

hisab-e-shab-o-roz karte hue

teri amman ke rasha-zada hath KHush-haaliyan DhunDte DhunDte

in dhule bartanon mein paDe rah gae

subh-e-tabir ne shaKH par sabz hone ki hasrat likhi

aankh ko motiya de diya

dekhta kyun nahin aaj bazar mein jashn-e-iflas hai

shahr ki bhuk chori hui

aur KHabron ne aKHbar gum kar diya

log rote rahe

log hanste rahe

tere bistar pe ashkon ki champa khili

aur tu chup raha

tere mathe pe muskan ka itr chhiDka gaya

aur tu chup raha

meri hanDiya jali

mera chulha bujha

meri jholi se harf-e-dua gir gaya

mere bachche tu lab kholta kyun nahin

bolta kyun nahin