boski

vaqt ko aate na jaate na guzarte dekhā

na utarte hue dekhā kabhī ilhām kī sūrat

jam.a hote hue ik jagah magar dekhā hai

shāyad aayā thā vo ḳhvāboñ se dabe paañv hī

aur jab aayā ḳhayāloñ ko bhī ehsās na thā

aañkh kā rañg tulūa hote hue dekhā jis din

maiñ ne chūmā thā magar vaqt ko pahchānā na thā

chand tutlā.e hue boloñ meñ aahaT bhī sunī

duudh kā daañt girā thā to vahāñ bhī dekhā

boskī beTī mirī chiknī sī resham kī Dalī

lipTī-lipTā.ī huī reshmī tāñgoñ meñ paḌī thī

mujh ko ehsās nahīñ thā ki vahāñ vaqt paḌā hai

pālnā khol ke jab maiñ ne utārā thā use bistar par

lorī ke boloñ se ik baar chhuā thā us ko

baḌhte nāḳhūnoñ meñ har baar tarāshā bhī thā

chūḌiyāñ chaḌhtī utartī thiiñ kalā.ī pe musalsal

aur hāthoñ se utartī kabhī chaḌhtī thiiñ kitābeñ

mujh ko ma.alūm nahīñ thā ki vahāñ vaqt likhā hai

vaqt ko aate na jaate na guzarte dekhā

jama.a hote hue dekhā magar us ko maiñ ne

is baras boskī aThārah baras kī hogī

waqt ko aate na jate na guzarte dekha

na utarte hue dekha kabhi ilham ki surat

jama hote hue ek jagah magar dekha hai

shayad aaya tha wo KHwabon se dabe panw hi

aur jab aaya KHayalon ko bhi ehsas na tha

aankh ka rang tulua hote hue dekha jis din

main ne chuma tha magar waqt ko pahchana na tha

chand tutlae hue bolon mein aahaT bhi suni

dudh ka dant gira tha to wahan bhi dekha

boski beTi meri chikni si resham ki Dali

lipTi-lipTai hui reshmi tangon mein paDi thi

mujh ko ehsas nahin tha ki wahan waqt paDa hai

palna khol ke jab main ne utara tha use bistar par

lori ke bolon se ek bar chhua tha us ko

baDhte naKHunon mein har bar tarasha bhi tha

chuDiyan chaDhti utarti thin kalai pe musalsal

aur hathon se utarti kabhi chaDhti thin kitaben

mujh ko malum nahin tha ki wahan waqt likha hai

waqt ko aate na jate na guzarte dekha

jama hote hue dekha magar us ko main ne

is baras boski aThaarah baras ki hogi