buDhapa

apnī javānī se tang aa kar

maiñ ne buḌhāpe ko ḳhat likh diyā hai

maiñ ne apne taḳhayyul se ek aurat

taḳhlīq kī hai bilkul

vaisī jaisī mujhe chāhiye thī

maiñ ne ek kamra daryāft kar liyā hai

jahāñ ek zinda qabr meñ

maiñ ne apne saare raaz dafnā diye haiñ

maiñ apne dukhoñ ko ikaTThā kar ke

ek na.ī nazm kī buniyād rakkhūñgā

aur use gungunāte hue

ḳhud ko ek bose se navāzūñgā

sochtā huuñ maiñ ek āḳhirī mulāqāt karūñ

apnī javānī se aur use buḌhāpe se milvā.ūñ

lekin Dar hai kahīñ vo ḳhafā ho kar mere

saare raaz na khol de

merī zindagī bhī mujh se tang aa kar

ghar kī dahlīz par dharnā diye baiThī hai

vo ek ḳhush-gavār shurūāt kā

mutālba kar rahī hai

galī ke kināre baiThe faqīr ke

chehre se zindagī kī

haivāniyat kā andāza lagāyā jā saktā hai

maiñ ab vo gaalī ījād karnā chāhtā huuñ

jo maiñ zindagī kī haivāniyat

ko tohfa kar sakūñ

shāyad ab tamām udaas logoñ ko

ek na.e jazīre kī taraf hijrat karnī chāhiye

aur ḳhushiyoñ kā ek parcham us par lahrā kar

ġhamoñ ko ek bose ke saath

alvidā.a kahnā hogā

magar sapne dekh kar ḳhud ko

dilāsa dene kī aadat

maiñ ab tark kar chukā huuñ

darvāze kī dastak ne mujhe aur

udaas kar diyā hai

pahlī baar mere ḳhat kā javāb

itne jaldī aa gayā

apni jawani se tang aa kar

main ne buDhape ko KHat likh diya hai

main ne apne taKHayyul se ek aurat

taKHliq ki hai bilkul

waisi jaisi mujhe chahiye thi

main ne ek kamra daryaft kar liya hai

jahan ek zinda qabr mein

main ne apne sare raaz dafna diye hain

main apne dukhon ko ikaTTha kar ke

ek nai nazm ki buniyaad rakkhunga

aur use gungunate hue

KHud ko ek bose se nawazunga

sochta hun main ek aaKHiri mulaqat karun

apni jawani se aur use buDhape se milwaun

lekin Dar hai kahin wo KHafa ho kar mere

sare raaz na khol de

meri zindagi bhi mujh se tang aa kar

ghar ki dahliz par dharna diye baiThi hai

wo ek KHush-gawar shuruat ka

mutalba kar rahi hai

gali ke kinare baiThe faqir ke

chehre se zindagi ki

haiwaniyat ka andaza lagaya ja sakta hai

main ab wo gali ijad karna chahta hun

jo main zindagi ki haiwaniyat

ko tohfa kar sakun

shayad ab tamam udas logon ko

ek nae jazire ki taraf hijrat karni chahiye

aur KHushiyon ka ek parcham us par lahra kar

ghamon ko ek bose ke sath

alwidaa kahna hoga

magar sapne dekh kar KHud ko

dilasa dene ki aadat

main ab tark kar chuka hun

darwaze ki dastak ne mujhe aur

udas kar diya hai

pahli bar mere KHat ka jawab

itne jaldi aa gaya