bujha rut

ye mere dil kī pagDanDī pe chaltī nazm hai koī

ki sail-e-vaqt kī bhaTkī huī ik lahr sā lamha

jo āñchal par sitāre aur un āñkhoñ meñ aañsū Taañk detā hai

sitāroñ kī chamak

aur āñsuoñ kī jhilmilāhaT meñ

kisī ehsās-e-gum-gashta se likhā baab hai shāyad

koī sailāb hai shāyad

yā ik be-nām sī rasm-e-ta.alluq kā tarāshā ḳhvāb hai shāyad

jo āñkhoñ meñ utarte hī

kabhī chup kī surañg aur barf sāñsoñ kī laḌī meñ jhūltā hai

aur kabhī bahtā hai sach ban kar

lahū kī har ravānī meñ

nazar se jhāñktī ik umr jaisī rā.egānī meñ

magar

dil kī tahoñ meñ ik ḳhalish sī kasmasātī aur kahtī hai

ye sach kaisā hai ki

jalte hue dil ko gumāñ tak bhī jo chhāñv kā na de paa.e

ye kaisā sach hai

jis kī thaam kar uñglī koī rastoñ meñ kho jaa.e

ye mere dil ki pagDanDi pe chalti nazm hai koi

ki sail-e-waqt ki bhaTki hui ek lahr sa lamha

jo aanchal par sitare aur un aankhon mein aansu Tank deta hai

sitaron ki chamak

aur aansuon ki jhilmilahaT mein

kisi ehsas-e-gum-gashta se likha bab hai shayad

koi sailab hai shayad

ya ek be-nam si rasm-e-talluq ka tarasha KHwab hai shayad

jo aankhon mein utarte hi

kabhi chup ki surang aur barf sanson ki laDi mein jhulta hai

aur kabhi bahta hai sach ban kar

lahu ki har rawani mein

nazar se jhankti ek umr jaisi raegani mein

magar

dil ki tahon mein ek KHalish si kasmasati aur kahti hai

ye sach kaisa hai ki

jalte hue dil ko guman tak bhi jo chhanw ka na de pae

ye kaisa sach hai

jis ki tham kar ungli koi raston mein kho jae