bujhi hui jawaniyan

na iztirāb-e-ġhaznavī na mashrab-e-ayāz hai

na ḳhuun meñ harārateñ na soz hai na saaz hai

na zauq-e-jām-o-mai-kada na but-kade kī aarzū

na tauf kū-e-yār kā na hasrateñ na justujū

na zauq-e-teġh-e-nāz hai na shauq-e-nāvak-e-nazar

na nāla-e-hazīñ-rasā na āh-e-sard meñ asar

na ham-nashīñ na valvala ki lau kahīñ lagā.eñ ham

na hausla ki saḳhtiyāñ firāq kī uThā.eñ ham

na sāz-e-ishq ġham-rubā na kaif-zā hai jām-e-ġham

na iztirāb-e-hijr hai na intizār-e-shām-e-ġham

na sarḳhushī na āqilī na āshiqī na bandagī

na naġhma-e-tarab-fizā na ġham-tarāz-e-zindagī

masarrateñ na rāhateñ mohabbateñ na lazzateñ

baḌhī huī kudūrateñ baḌhī huī adāvateñ

na dard-mañd ishq haiñ na chāra-sāz-e-dard haiñ

uThe to kyā rahe to kyā ki rahguzar kī gard haiñ

na shorisheñ na kāvisheñ na josh hai na valvala

bujhī huī tabī.ateñ bujhā huā sā hausla

agar yahī hai zindagī agar yahī shabāb hai

to maiñ kahūñgā dosto ye mustaqil azaab hai

na iztirab-e-ghaznawi na mashrab-e-ayaz hai

na KHun mein hararaten na soz hai na saz hai

na zauq-e-jam-o-mai-kada na but-kade ki aarzu

na tauf ku-e-yar ka na hasraten na justuju

na zauq-e-tegh-e-naz hai na shauq-e-nawak-e-nazar

na nala-e-hazin-rasa na aah-e-sard mein asar

na ham-nashin na walwala ki lau kahin lagaen hum

na hausla ki saKHtiyan firaq ki uThaen hum

na saz-e-ishq gham-ruba na kaif-za hai jam-e-gham

na iztirab-e-hijr hai na intizar-e-sham-e-gham

na sarKHushi na aaqili na aashiqi na bandagi

na naghma-e-tarab-fiza na gham-taraaz-e-zindagi

masarraten na rahaten mohabbaten na lazzaten

baDhi hui kuduraten baDhi hui adawaten

na dard-mand ishq hain na chaara-saz-e-dard hain

uThe to kya rahe to kya ki rahguzar ki gard hain

na shorishen na kawishen na josh hai na walwala

bujhi hui tabiaten bujha hua sa hausla

agar yahi hai zindagi agar yahi shabab hai

to main kahunga dosto ye mustaqil azab hai