bulbul aur gulab

bulbul

ai rang bhare gulāb ke phuul

is shaan is āb-o-tāb ke phuul

dilchasp bahut haiñ rang tere

haiñ mujh ko pasand Dhang tere

khiltā hai jo tū is anjuman meñ

lagtī hai ik aag sī chaman meñ

kyā ye asar hai pankhuḌī meñ

kaisī hai chaTak kalī kalī meñ

kis ne tujhe is-qadar sajāyā

kis ne tujhe baaġh meñ khilāyā

kyoñ tujh meñ hai dilkashī ziyāda

kis mulk kā tū hai shāh-zāda

gulāb

ai rang bhare tarāne vaalī

gulshan meñ bahār gaane vaalī

ai baaġh kī lā-javāb chiḌiyā

ai shefta-e-gulāb chiḌiyā

jis ne tujhe chahchahe diye haiñ

dilchasp ye zamzame diye haiñ

us ne mujhe phuul hai banāyā

ik peḌ kī shāḳh se ugāyā

sab phuul haiñ mere aage saada

us baaġh kā huuñ maiñ shāhzāda

mujh sā nahīñ aur koī ḳhush-baḳht

hai mere liye bihār kā taḳht

bulbul

pyāre mire ai gulāb ke phuul

ai gulshan-e-lā-javāb ke phuul

rangīn ḳhamosh sīdhe saade

ai mulk-e-chaman ke shāhzāde

kartī hai bahār jab kinārā

ho jaatā hai zard baaġh saarā

aatā nahīñ kyuuñ mujhe nazar tū

jaatā hai chhupā chhupā kidhar tū

murjhātī haiñ terī saarī kaliyāñ

rahtī nahīñ phir ye rang-raliyāñ

uḌ jaatī hai bū hinā kī mānind

hotā hai fanā havā kī mānind

gulāb

ai mutriba-e-bahār bulbul

ai āshiq-e-be-qarār bulbul

hotā huuñ maiñ ḳhaak hī se paidā

āḳhir ko huuñ ḳhaak hī meñ miltā

ġham-ḳhvār bhī ġham-gusār bhī hai

maañ bhī hai yahī mazār bhī hai

duniyā meñ haiñ jitne phuul kaliyāñ

hai sab meñ baqā fanā numāyāñ

murjhā ke har ek phuul pattā

hotā hai phir is zamīñ se paidā

har phuul meñ hai ḳhudā kī qudrat

har ḳhaar meñ hai usī kī hikmat

bulbul

ai rang bhare gulab ke phul

is shan is aab-o-tab ke phul

dilchasp bahut hain rang tere

hain mujh ko pasand Dhang tere

khilta hai jo tu is anjuman mein

lagti hai ek aag si chaman mein

kya ye asar hai pankhuDi mein

kaisi hai chaTak kali kali mein

kis ne tujhe is-qadar sajaya

kis ne tujhe bagh mein khilaya

kyon tujh mein hai dilkashi ziyaada

kis mulk ka tu hai shah-zada

gulab

ai rang bhare tarane wali

gulshan mein bahaar gane wali

ai bagh ki la-jawab chiDiya

ai shefta-e-gulab chiDiya

jis ne tujhe chahchahe diye hain

dilchasp ye zamzame diye hain

us ne mujhe phul hai banaya

ek peD ki shaKH se ugaya

sab phul hain mere aage sada

us bagh ka hun main shahzada

mujh sa nahin aur koi KHush-baKHt

hai mere liye bihaar ka taKHt

bulbul

pyare mere ai gulab ke phul

ai gulshan-e-la-jawab ke phul

rangin KHamosh sidhe sade

ai mulk-e-chaman ke shahzade

karti hai bahaar jab kinara

ho jata hai zard bagh sara

aata nahin kyun mujhe nazar tu

jata hai chhupa chhupa kidhar tu

murjhati hain teri sari kaliyan

rahti nahin phir ye rang-raliyan

uD jati hai bu hina ki manind

hota hai fana hawa ki manind

gulab

ai mutriba-e-bahaar bulbul

ai aashiq-e-be-qarar bulbul

hota hun main KHak hi se paida

aaKHir ko hun KHak hi mein milta

gham-KHwar bhi gham-gusar bhi hai

man bhi hai yahi mazar bhi hai

duniya mein hain jitne phul kaliyan

hai sab mein baqa fana numayan

murjha ke har ek phul patta

hota hai phir is zamin se paida

har phul mein hai KHuda ki qudrat

har KHar mein hai usi ki hikmat