bulbul aur shair

ai andalīb-e-gulshan maiñ huuñ tirā fidā.ī

is saut-e-jāñ-fazā kī allah re dil-rubā.ī

banda samajh mujhe tū halqa-ba-gosh apnā

tujh se kabhī na hūñgā maiñ tālib-e-rihā.ī

chhup kar chaman meñ aksar gulban kī aaḌ se bhī

pahroñ sunī hai terī jāñ-baḳhsh ḳhush-navā.ī

murda diloñ meñ aksar phūñkī hai ruuh tū ne

ham ne tirī sadā kī dekhī hai jāñ-fazā.ī

ai naġhma-sanj tujh par hai ḳhatm naġhma-sanjī

ik baat maiñ ne lekin tujh meñ kabhī na paa.ī

terī sadā-e-dilkash pahuñchī na duur hargiz

duniyā meñ har jagah par is kī nahīñ rasā.ī

mumkin nahīñ ye tujh se aisā tarāna gūñje

baiThī rahe yahīñ tū lekin zamāna gūñje

ai nukta-sanj shā.ir ye to hai kaam terā

aisā tarāna dekhā be-shak kalām terā

kuchh aisī taan chheḌī mahzūz ho ga.e sab

mamnūn ho rahā hai har ḳhās-o-ām terā

zulf-e-suḳhan kī terī allāh rī rasā.ī

har-sū bichhā huā hai duniyā meñ daam terā

terā kalām kyā hai tasḳhīr kā amal hai

hindū ho yā musalmāñ har ik hai raam terā

sarshār hai zamāna is bāda-e-suḳhan se

duniyā kī mahfiloñ meñ chaltā hai jaam terā

āvāza terā pahuñchā yūnān meñ ajam meñ

vāsif hai ruum terā maddāh shaam terā

tū asia meñ baiThā kartā hai nukta-sanjī

pahuñchā hai jā ke europe lekin kalām terā

chhūTā nahīñ abhī tak pābandī-e-vatan se

ġhurbat meñ kaise pahuñchā 'bāsit' ye naam terā

tere shikasta par meñ parvāz bhī nahīñ hai

aisī rasā to terī āvāz bhī nahīñ hai

ai andalib-e-gulshan main hun tera fidai

is saut-e-jaan-faza ki allah re dil-rubai

banda samajh mujhe tu halqa-ba-gosh apna

tujh se kabhi na hunga main talib-e-rihai

chhup kar chaman mein aksar gulban ki aaD se bhi

pahron suni hai teri jaan-baKHsh KHush-nawai

murda dilon mein aksar phunki hai ruh tu ne

hum ne teri sada ki dekhi hai jaan-fazai

ai naghma-sanj tujh par hai KHatm naghma-sanji

ek baat main ne lekin tujh mein kabhi na pai

teri sada-e-dilkash pahunchi na dur hargiz

duniya mein har jagah par is ki nahin rasai

mumkin nahin ye tujh se aisa tarana gunje

baiThi rahe yahin tu lekin zamana gunje

ai nukta-sanj shair ye to hai kaam tera

aisa tarana dekha be-shak kalam tera

kuchh aisi tan chheDi mahzuz ho gae sab

mamnun ho raha hai har KHas-o-am tera

zulf-e-suKHan ki teri allah ri rasai

har-su bichha hua hai duniya mein dam tera

tera kalam kya hai tasKHir ka amal hai

hindu ho ya musalman har ek hai ram tera

sarshaar hai zamana is baada-e-suKHan se

duniya ki mahfilon mein chalta hai jam tera

aawaza tera pahuncha yunan mein ajam mein

wasif hai rum tera maddah sham tera

tu asia mein baiTha karta hai nukta-sanji

pahuncha hai ja ke europe lekin kalam tera

chhuTa nahin abhi tak pabandi-e-watan se

ghurbat mein kaise pahuncha 'basit' ye nam tera

tere shikasta par mein parwaz bhi nahin hai

aisi rasa to teri aawaz bhi nahin hai