bulbul

maiñ huuñ chahakne vaalī bulbul

mere liye hī khilte haiñ gul

giit sunātī huuñ phūloñ ko

gale lagātī huuñ phūloñ ko

āvāz aisī surīlī paa.ī

merī bolī sab ko bhaa.ī

dam phūloñ kā bhartī huuñ maiñ

phūloñ par hī martī huuñ maiñ

mere lai har ik ko bhaa.ī

ḳhush hai mujh se saarī ḳhudā.ī

shā.ir haiñ mashriq meñ jitne

gun gaate haiñ sab hī mere

zāhir meñ huuñ chhoTī lekin

saarā chaman suunā hai mujh bin

laḌko tum to ḳhud ho daanā

bhed ye kyā ab tum ko batānā

merī sadā dilkash hai jo itnī

baat baḌī is meñ nahīñ koī

dī hai ye ne.amat mujh ko ḳhudā ne

moh liye dil merī sadā ne

kaun ḳhudā vo sab kā maulā

jis ne is duniyā ko banāyā

meñh barsāyā paude ugaa.e

rang-birange phuul khilā.e

jin kī bhīnī bhīnī bū se

jangal mahke gulshan mahke

hai vo do-ālam kā rakhvālā

kahte haiñ jis ko bārī-ta.ālā

ham sab kā mālik vo ḳhudā hai

maañ baap aur bhaa.ī se sivā hai

gaatī huuñ giit us ke har dam

jis ne banāyā hai ye aalam

giit usī ke tum bhī gaao

apne rab ko bhuul na jaao

'jauhar' phir duniyā hai tumhārī

suntā hai sab kuchh vo hamārī

fazl ḳhudā kā jab ho jaa.e

jo māñge insān vo paa.e

main hun chahakne wali bulbul

mere liye hi khilte hain gul

git sunati hun phulon ko

gale lagati hun phulon ko

aawaz aisi surili pai

meri boli sab ko bhai

dam phulon ka bharti hun main

phulon par hi marti hun main

mere lai har ek ko bhai

KHush hai mujh se sari KHudai

shair hain mashriq mein jitne

gun gate hain sab hi mere

zahir mein hun chhoTi lekin

sara chaman suna hai mujh bin

laDko tum to KHud ho dana

bhed ye kya ab tum ko batana

meri sada dilkash hai jo itni

baat baDi is mein nahin koi

di hai ye neamat mujh ko KHuda ne

moh liye dil meri sada ne

kaun KHuda wo sab ka maula

jis ne is duniya ko banaya

meinh barsaya paude ugae

rang-birange phul khilae

jin ki bhini bhini bu se

jangal mahke gulshan mahke

hai wo do-alam ka rakhwala

kahte hain jis ko bari-taala

hum sab ka malik wo KHuda hai

man bap aur bhai se siwa hai

gati hun git us ke har dam

jis ne banaya hai ye aalam

git usi ke tum bhi gao

apne rab ko bhul na jao

'jauhar' phir duniya hai tumhaari

sunta hai sab kuchh wo hamari

fazl KHuda ka jab ho jae

jo mange insan wo pae