bulbul o parwana

girā rahā hai tirā shauq sham.a par tujh ko

mujhe ye Dar hai na pahuñche kahīñ zarar tujh ko

faroġh-e-shola kahāñ aur faroġh-e-husn kahāñ

hazār haif ki itnī nahīñ ḳhabar tujh ko

taḌap taḌap ke jo be-iḳhtiyār kartā hai

nahīñ hai aag ke shola se aah Dar tujh ko

ye nanhe nanhe par o baal ye sitam kī tapish

milā hai aah qayāmat kā kyā jigar tujh ko

qarīb sham.a ke aa kar jo thartharātā hai

nahīñ hai jaan ke jaane kā ġham magar tujh ko

milegī ḳhaak bhī DhūñDe na terī mahfil meñ

sabā uḌaa.e phiregī dam-e-sahar tujh ko

samajh na sham.a ko dil soz āfiyat dushman

jalā ke aah rahegī ye musht-e-par tujh ko

nahīñ hai tū abhī soz-o-gudāz ke qābil

nahīñ hai ishq kī arz o niyāz ke qābil

tapish ye bazm meñ fānūs par nahīñ achchhī

ki aag laag kī o be-ḳhabar nahīñ achchhī

kaḌī hai aañch mohabbat kī sham-e-mahfil se

lagāvTeñ are tufta-jigar nahīñ achchhī

taḌap taḌap ke na dīvāna-vār sham.a pe gir

tapish ye shauq kii, o musht-e-par nahīñ achchhī

ye jāñ-gudāzi-e-soz-e-vafā sar-e-mahfil

kahīñ na ho tire jī kā zarar nahīñ achchhī

laḌā na sham.a se āñkheñ ki hai udū terī

tirī nigāh-e-mohabbat-asar nahīñ achchhī

ye nanhe nanhe paroñ kī taḌap ye betābī

Harīf-e-shoḳhi-e-barq-e-nazar nahīñ achchhī

ye par sameT ke fānūs par tirā girnā

ye be-ḳhudī are shorīda-sar nahīñ achchhī

chaman meñ chal ki dikhā.ūñ bahār-e-shāhid-e-gul

nazar fareb haiñ naqsh-o-nigār-e-shāhid-e-gul

maiñ bul-havas nahīñ samjhā hai tū ne kyā mujh ko

pasand shāhid-e-gul kī nahīñ adā mujh ko

firāqe-e-gul meñ maiñ minnta-kash-e-fuġhāñ huuñ dareġh

ye dāġh-e-soz-e-judā.ī na de ḳhudā mujh ko

Dil-e-gudāḳhta le kar azal se aayā huuñ

banāyā bazm meñ hai soz-āshnā mujh ko

jale vo bazm meñ chup-chāp aur maiñ na jalūñ

ba.iid ishq se hai ho ġham-e-fanā mujh ko

tirī nigāh meñ jāñ-soz hai jo ai bulbul

vo aah aag kā shola hai jāñ-fazā mujh ko

khulā hai tujh pe abhī aah rāz-e-ishq kahāñ

tū bul-havas hai, tujhe imtiyāz-e-ishq kahāñ

gira raha hai tera shauq shama par tujh ko

mujhe ye Dar hai na pahunche kahin zarar tujh ko

farogh-e-shola kahan aur farogh-e-husn kahan

hazar haif ki itni nahin KHabar tujh ko

taDap taDap ke jo be-iKHtiyar karta hai

nahin hai aag ke shola se aah Dar tujh ko

ye nanhe nanhe par o baal ye sitam ki tapish

mila hai aah qayamat ka kya jigar tujh ko

qarib shama ke aa kar jo thartharaata hai

nahin hai jaan ke jaane ka gham magar tujh ko

milegi KHak bhi DhunDe na teri mahfil mein

saba uDae phiregi dam-e-sahar tujh ko

samajh na shama ko dil soz aafiyat dushman

jala ke aah rahegi ye musht-e-par tujh ko

nahin hai tu abhi soz-o-gudaz ke qabil

nahin hai ishq ki arz o niyaz ke qabil

tapish ye bazm mein fanus par nahin achchhi

ki aag lag ki o be-KHabar nahin achchhi

kaDi hai aanch mohabbat ki sham-e-mahfil se

lagawTen are tufta-jigar nahin achchhi

taDap taDap ke na diwana-war shama pe gir

tapish ye shauq ki, o musht-e-par nahin achchhi

ye jaan-gudazi-e-soz-e-wafa sar-e-mahfil

kahin na ho tere ji ka zarar nahin achchhi

laDa na shama se aankhen ki hai udu teri

teri nigah-e-mohabbat-asar nahin achchhi

ye nanhe nanhe paron ki taDap ye betabi

Harif-e-shoKHi-e-barq-e-nazar nahin achchhi

ye par sameT ke fanus par tera girna

ye be-KHudi are shorida-sar nahin achchhi

chaman mein chal ki dikhaun bahaar-e-shahid-e-gul

nazar fareb hain naqsh-o-nigar-e-shahid-e-gul

main bul-hawas nahin samjha hai tu ne kya mujh ko

pasand shahid-e-gul ki nahin ada mujh ko

firaqe-e-gul mein main minnta-kash-e-fughan hun daregh

ye dagh-e-soz-e-judai na de KHuda mujh ko

Dil-e-gudaKHta le kar azal se aaya hun

banaya bazm mein hai soz-ashna mujh ko

jale wo bazm mein chup-chap aur main na jalun

baid ishq se hai ho gham-e-fana mujh ko

teri nigah mein jaan-soz hai jo ai bulbul

wo aah aag ka shola hai jaan-faza mujh ko

khula hai tujh pe abhi aah raaz-e-ishq kahan

tu bul-hawas hai, tujhe imtiyaz-e-ishq kahan