buqraat bahut khata tha

ham ne mahbūb ke aivān meñ jā kar dekhā

chiin meñ misr meñ īrān meñ jā kar dekhā

ruus meñ shaam meñ sudan meñ jā kar dekhā

aur phir ḳhāna-e-sultān meñ jā kar dekhā

nosh-o-ḳhurdan hai navishta tire dīvāne kā

jab huī ḳhushk to mahbūb kī kākul ne kahā

vo jo maike ga.iiñ un se yahī bābul ne kahā

okhle vāloñ se jamunā ke na.e pul ne kahā

aur sunte haiñ ki babbū se ye abdul ne kahā

nosh-o-ḳhurdan hai navishta tire dīvāne kā

roTiyāñ baiTh ke hotel meñ pakātā hai koī

madrase meñ koī paḌhtā hai paḌhātā hai koī

apnī Dholak liye darbār meñ gaatā hai koī

aur Daflī sar-e-bāzār bajātā hai koī

nosh-o-ḳhūrdan hai navishta tire dīvāne kā

tujh ko fursat hī nahīñ apne jahāñ se mahbūb

tū nikaltā hai kabhī apne makāñ se mahbūb

phir ye ilhām huā tujh ko kahāñ se mahbūb

maiñ ne akasr ye sunā hai tirī maañ se mahbūb

nosh-o-ḳhūrdan hai navishta tire dīvāne kā

faaqa kar ke na buḌhāpe meñ javānī Daalo

peT meñ pahle mire kuchh to bhavānī Daalo

phir gale meñ mire ulfat kī nishānī Daalo

ghē mire khāne meñ kuchh aur mamānī Daalo

nosh-o-ḳhurdan hai navishta tire dīvāne kā

khāne piine se jo mohlat kabhī pā jaatā thā

har mo.arriḳh sar-e-tārīḳh pe farmātā thā

vo arastū ho ki buqrāt bahut khātā thā

aur phir raat ko akasr yahī barrātā thā

nosh-o-ḳhūrdan hai navishta tire dīvāne kā

hum ne mahbub ke aiwan mein ja kar dekha

chin mein misr mein iran mein ja kar dekha

rus mein sham mein sudan mein ja kar dekha

aur phir KHana-e-sultan mein ja kar dekha

nosh-o-KHurdan hai nawishta tere diwane ka

jab hui KHushk to mahbub ki kakul ne kaha

wo jo maike gain un se yahi babul ne kaha

okhle walon se jamuna ke nae pul ne kaha

aur sunte hain ki babbu se ye abdul ne kaha

nosh-o-KHurdan hai nawishta tere diwane ka

roTiyan baiTh ke hotel mein pakata hai koi

madrase mein koi paDhta hai paDhata hai koi

apni Dholak liye darbar mein gata hai koi

aur Dafli sar-e-bazar bajata hai koi

nosh-o-KHurdan hai nawishta tere diwane ka

tujh ko fursat hi nahin apne jahan se mahbub

tu nikalta hai kabhi apne makan se mahbub

phir ye ilham hua tujh ko kahan se mahbub

main ne akasr ye suna hai teri man se mahbub

nosh-o-KHurdan hai nawishta tere diwane ka

faqa kar ke na buDhape mein jawani Dalo

peT mein pahle mere kuchh to bhawani Dalo

phir gale mein mere ulfat ki nishani Dalo

ghee mere khane mein kuchh aur mamani Dalo

nosh-o-KHurdan hai nawishta tere diwane ka

khane pine se jo mohlat kabhi pa jata tha

har moarriKH sar-e-tariKH pe farmata tha

wo arastu ho ki buqraat bahut khata tha

aur phir raat ko akasr yahi barraata tha

nosh-o-KHurdan hai nawishta tere diwane ka