bus ka safar

un hī se pūchhtā huuñ maiñ safar karte haiñ jo bus meñ

ki de dete ho apnī zindagī kyuuñ ġhair ke bas meñ

ye bus vo hai ki bas ho jaa.e jab motor to bantī hai

saḌak par ruuTh jaa.e to baḌī mushkil se mantī hai

ye akasr baiThne vāloñ ke dhakkoñ se khisaktī hai

kabhī kashtī meñ dariyā hai kabhī dariyā meñ kashtī hai

safar karte haiñ is meñ jab barātī aur dulhan dūlhā

to ban jaatī hai motor jā.idād-e-ġhair-manqūla

aur is ke ba.ad agar tārīk hai shab duur manzil hai

to karte haiñ tavāf is kā vo majnūñ jin kī mahmil hai

cleaner se yahī kahtā hai shofer ho ke bechārā

''ki kas nakashūd-o-nakashāyad ba-hikmat iiñ muamma raa''

agar us vaqt meñ sardī bhī lag jaa.e to kyā ġham hai

''ye fitna aadmī kī ḳhāna-vīrānī ko kyā kam hai''

jo ruk jaa.e ravāñ kyuuñ ho jo baḌhiyā hai javāñ kyuuñ ho

''huī ye dost jin kī dushman un kā āsmāñ kyuuñ ho''

barātī khīñchte ye jā.idād aate haiñ shahroñ meñ

jo rasta chand ghaḌiyoñ kā hai vo kaTtā hai pahroñ meñ

zarā se ek pañkchar se bigaḌtā hai siñghār is kā

havā par jis kī hastī ho bhalā kyā e'tibār us kā

ġhubār aur gard kā aur tel kī bū kā ḳhazīna hai

ye motor-car aur ''gaDDe'' kī aulād-e-narīna hai

milī gaDDe se ra.anā.ī o zebā.ī virāsat meñ

ḳhar-e-dajjāl se miltī hai sūrat meñ malāhat meñ

samāte haiñ phir us meñ Thas ke yuuñ be-lutf-o-āsā.ish

nahīñ rahtī hai nāloñ ke nikalne kī bhī gunjā.ish

basoñ kī chhat pe lad kar duudh ke bartan jo aate haiñ

saroñ par shiir kā bārān-e-rahmat vo girāte haiñ

vo nādāñ haiñ jo is bārish pe naak aur bhauñ chaḌhāte haiñ

sile meñ saḳht-jānī ke ye jū-e-shīr paate haiñ

paḌā hogā basoñ meñ aap ko aisoñ se bhī paalā

uThī khujlī to apne saath sāthī ko khujā Daalā

un hi se puchhta hun main safar karte hain jo bus mein

ki de dete ho apni zindagi kyun ghair ke bas mein

ye bus wo hai ki bas ho jae jab motor to banti hai

saDak par ruTh jae to baDi mushkil se manti hai

ye akasr baiThne walon ke dhakkon se khisakti hai

kabhi kashti mein dariya hai kabhi dariya mein kashti hai

safar karte hain is mein jab baraati aur dulhan dulha

to ban jati hai motor jaidad-e-ghair-manqula

aur is ke baad agar tarik hai shab dur manzil hai

to karte hain tawaf is ka wo majnun jin ki mahmil hai

cleaner se yahi kahta hai shofer ho ke bechaara

ki kas nakashud-o-nakashayad ba-hikmat in muamma ra

agar us waqt mein sardi bhi lag jae to kya gham hai

ye fitna aadmi ki KHana-virani ko kya kam hai

jo ruk jae rawan kyun ho jo baDhiya hai jawan kyun ho

hui ye dost jin ki dushman un ka aasman kyun ho

baraati khinchte ye jaidad aate hain shahron mein

jo rasta chand ghaDiyon ka hai wo kaTta hai pahron mein

zara se ek pankchar se bigaDta hai singhaar is ka

hawa par jis ki hasti ho bhala kya e'tibar us ka

ghubar aur gard ka aur tel ki bu ka KHazina hai

ye motor-car aur gaDDe ki aulad-e-narina hai

mili gaDDe se ranai o zebai wirasat mein

KHar-e-dajjal se milti hai surat mein malahat mein

samate hain phir us mein Thas ke yun be-lutf-o-asaish

nahin rahti hai nalon ke nikalne ki bhi gunjaish

bason ki chhat pe lad kar dudh ke bartan jo aate hain

saron par shir ka baran-e-rahmat wo giraate hain

wo nadan hain jo is barish pe nak aur bhaun chaDhate hain

sile mein saKHt-jaani ke ye ju-e-shir pate hain

paDa hoga bason mein aap ko aison se bhi pala

uThi khujli to apne sath sathi ko khuja Dala