but-tarash

ik fusūñ-kār but-tarāsh huuñ maiñ

zindagī kī tavīl rātoñ ko

baar haale ke tesha-e-afkār

but tarāshe haiñ saiñkaḌoñ maiñ ne

tire sāñche meñ Dhālne ke liye

chāñd se nor-e-marmarīñ le kar

terā sīmīñ badan tarāsh liyā

mehr se tāb-e-ātishīñ le kar

tire rañgīñ laboñ kā ruup diyā

le ke tauba kī ambarīñ saa.e

terī zulfoñ ke baal mahkā.e

ghuum kar ḳhuld kī fazāoñ meñ

sarmadī sarḳhushī uThā laayā

rañg bhar kar tirī adāoñ meñ

abadī rāhatoñ ko sharmāyā

le ke sīmā-e-hūr kī taqdīs

chhīn kar maiñ ne qudsiyoñ kā vaqār

zindagī dī tirī nigāhoñ ko

aur banā.īñ tirī hasīñ āñkheñ

nazar-e-bad kahīñ na lag jaa.e

maiñ ne tāroñ se chhīn leñ āñkheñ

phir bhī maiñ tujh se duur duur rahā

phir bhī tujh se na mil sakīñ āñkheñ

yuuñ to ik kohna but-tarāsh huuñ meñ

zindagī kī tavīl rātoñ ko

baar haale ke tesha-e-afkār

but-tarāshe haiñ saiñkaḌoñ maiñ ne

but-tarāshe haiñ toḌ Daale haiñ

ek fusun-kar but-tarash hun main

zindagi ki tawil raaton ko

bar haale ke tesha-e-afkar

but tarashe hain sainkaDon main ne

tere sanche mein Dhaalne ke liye

chand se nor-e-marmarin le kar

tera simin badan tarash liya

mehr se tab-e-atishin le kar

tere rangin labon ka rup diya

le ke tauba ki ambarin sae

teri zulfon ke baal mahkae

ghum kar KHuld ki fazaon mein

sarmadi sarKHushi uTha laya

rang bhar kar teri adaon mein

abadi rahaton ko sharmaya

le ke sima-e-hur ki taqdis

chhin kar main ne qudsiyon ka waqar

zindagi di teri nigahon ko

aur banain teri hasin aankhen

nazar-e-bad kahin na lag jae

main ne taron se chhin len aankhen

phir bhi main tujh se dur dur raha

phir bhi tujh se na mil sakin aankhen

yun to ek kohna but-tarash hun mein

zindagi ki tawil raaton ko

bar haale ke tesha-e-afkar

but-tarashe hain sainkaDon main ne

but-tarashe hain toD Dale hain