buz-dili

ye koī tarīqa hai tanz yuuñ nahīñ karte 'shād'-ārfī-sāhib

aap jaise dil vaale is tarah nahīñ marte 'shād'-ārfī-sāhib

bāġhbāñ kī sāzish se phuul toḌ kar gulchīñ ḳhaar meñ piro.eñge

naam le ke tūfāñ kā nāḳhudā safīnoñ ko ret meñ Dibo.eñge

aap kī tamannā thī jail jā ke marne kī bhuul ho ga.ī shāyad

lūTtī rahī paiham saaTh saal jo duniyā yuuñ na baḳhshiye us ko

maañ kī maut par apnā jo makān bechā thā yaad kījiye us ko

'shād'-ārfī-sāhib aap ko to duniyā se intiqām lenā hai

sochiye zamāne ne aap ko diyā kyā hai aap se liyā kyā hai

fikr-o-fan ke badle meñ talḳhiyāñ atā kī haiñ jis samāj ne qibla

pur-ḳhulūs siine par barchhiyāñ chalā.ī haiñ jis samāj ne qibla

aap kī ḳhamoshī par vo samāj hañstā hai dekh lījiye muḌ kar

phir koī na.ī phabtī tanz kā koī nashtar vaar kījiye muḌ kar

buz-dilī na hogī kyā zindagī ke mujrim ko yuuñ muaaf kar denā

maut kā to matlab hai zulm ke liye rāheñ aur saaf kar denā

ḳhair ham samajhte haiñ maut se nahīñ Darte 'shād'-ārfī-sāhib

ye bhī tanz hī hogā mar ke bhī nahīñ marte 'shād'-ārfī-sāhib

ye koi tariqa hai tanz yun nahin karte 'shad'-arfi-sahib

aap jaise dil wale is tarah nahin marte 'shad'-arfi-sahib

baghban ki sazish se phul toD kar gulchin KHar mein piroenge

nam le ke tufan ka naKHuda safinon ko ret mein Diboenge

aap ki tamanna thi jail ja ke marne ki bhul ho gai shayad

luTti rahi paiham saTh sal jo duniya yun na baKHshiye us ko

man ki maut par apna jo makan becha tha yaad kijiye us ko

'shad'-arfi-sahib aap ko to duniya se intiqam lena hai

sochiye zamane ne aap ko diya kya hai aap se liya kya hai

fikr-o-fan ke badle mein talKHiyan ata ki hain jis samaj ne qibla

pur-KHulus sine par barchhiyan chalai hain jis samaj ne qibla

aap ki KHamoshi par wo samaj hansta hai dekh lijiye muD kar

phir koi nai phabti tanz ka koi nashtar war kijiye muD kar

buz-dili na hogi kya zindagi ke mujrim ko yun muaf kar dena

maut ka to matlab hai zulm ke liye rahen aur saf kar dena

KHair hum samajhte hain maut se nahin Darte 'shad'-arfi-sahib

ye bhi tanz hi hoga mar ke bhi nahin marte 'shad'-arfi-sahib