buzdil

hujūm-e-sañg-e-anā aur zabt-e-paiham ne

misāl-e-reg-e-ravāñ be-qarār rakkhā hai

mire vajūd kī vahshat ne raat bhar mujh ko

ġhubār-e-qāfila-e-intizār rakkhā hai

ba-pesh-e-ḳhidmat-e-chashm-e-sarāb-ālūda

havā ne dast-e-talab baar baar rakkhā hai

maiñ terī yaad ke jaadū meñ thā sahar mujh ko

na-jāne kaun sī manzil pe lā ke chhoḌ ga.ī

ki saañs saañs meñ tere badan kī ḳhushbū hai

qadam qadam pe tirī āhaToñ kā Derā hai

magar nazar meñ faqat shab-zada saverā hai

tahī tahī se manāzir haiñ gard gard fazā

matā-e-umr vahī ek ḳhvāb terā hai

tire jamāl kā partav nahīñ magar phir bhī

ḳhayāl ā.īna-ḳhāna sajā.e baiThā hai

jidhar bhī aañkh uThātā huuñ ek vahshat hai

tū hī batā ki kahāñ tak fareb duuñ ḳhud ko

ki merā aks mire ḳhauf kī shahādat hai

mirā vajūd hai aur shahr-e-sañg-bārāñ hai

bachā.ūñ jaan ki ta.amīr-e-qasr-e-zāt karūñ

maiñ apnā haath baġhal meñ dabā.e sochtā huuñ

mire nasīb meñ sūraj kahāñ jo baat karūñ

maiñ vādiyoñ kī masāfat se kis liye niklūñ

safar ik aur pahāḌoñ ke paar rakkhā hai

hujum-e-sang-e-ana aur zabt-e-paiham ne

misal-e-reg-e-rawan be-qarar rakkha hai

mere wajud ki wahshat ne raat bhar mujh ko

ghubar-e-qafila-e-intizar rakkha hai

ba-pesh-e-KHidmat-e-chashm-e-sarab-aluda

hawa ne dast-e-talab bar bar rakkha hai

main teri yaad ke jadu mein tha sahar mujh ko

na-jaane kaun si manzil pe la ke chhoD gai

ki sans sans mein tere badan ki KHushbu hai

qadam qadam pe teri aahaTon ka Dera hai

magar nazar mein faqat shab-zada sawera hai

tahi tahi se manazir hain gard gard faza

mata-e-umr wahi ek KHwab tera hai

tere jamal ka partaw nahin magar phir bhi

KHayal aaina-KHana sajae baiTha hai

jidhar bhi aankh uThata hun ek wahshat hai

tu hi bata ki kahan tak fareb dun KHud ko

ki mera aks mere KHauf ki shahadat hai

mera wajud hai aur shahr-e-sang-baran hai

bachaun jaan ki tamir-e-qasr-e-zat karun

main apna hath baghal mein dabae sochta hun

mere nasib mein suraj kahan jo baat karun

main wadiyon ki masafat se kis liye niklun

safar ek aur pahaDon ke par rakkha hai