gawahi

maiñ mohabbat ke sitāroñ se nikaltā huā nuur

haq-o-nāhaq ke libādoñ meñ chhupā ek shu.ūr

mere hī dam se huā masjid-o-mandir kā zuhūr

maiñ musalmān-o-barahman ke irādoñ kā futūr

maiñ hayā-zādī-o-ḳhush-nain ke hoñToñ kā surūr

kisī majbūr tavā.if kī nigāhoñ kā qusūr

merī ḳhvāhish thī ki maiñ ḳhud hī zamīñ par jā.ūñ

aur zamīñ-zād kā ḳhud jā ke maiñ anjām karūñ

vo zamīñ-zād ki ehsān-farāmosh hai jo

vo zamīñ-zād ki jo ḳhud hī zamīñ par utrā

aur zamīñ vo jo vafādār nahīñ ho saktī

vo zamīñ jis pe ka.ī ḳhuun ke ilzām lage

vo zamīñ jis ne yahāñ dekhe haiñ kaTte hue sar

vo zamīñ detī rahī hai jo gunāhoñ ko panāh

vo zamīñ jis ne chhupā.e haiñ ka.ī rāz-o-niyāz

sāzisheñ hotī rahīñ jis pe mohabbat ke ḳhilāf

aur vo chup hai ugaltī hī nahīñ ek bhī lafz

mas.ala ye hai ki ab kis se gavāhī māñgūñ

main mohabbat ke sitaron se nikalta hua nur

haq-o-nahaq ke libaadon mein chhupa ek shuur

mere hi dam se hua masjid-o-mandir ka zuhur

main musalman-o-barahman ke iradon ka futur

main haya-zadi-o-KHush-nain ke honTon ka surur

kisi majbur tawaif ki nigahon ka qusur

meri KHwahish thi ki main KHud hi zamin par jaun

aur zamin-zad ka KHud ja ke main anjam karun

wo zamin-zad ki ehsan-faramosh hai jo

wo zamin-zad ki jo KHud hi zamin par utra

aur zamin wo jo wafadar nahin ho sakti

wo zamin jis pe kai KHun ke ilzam lage

wo zamin jis ne yahan dekhe hain kaTte hue sar

wo zamin deti rahi hai jo gunahon ko panah

wo zamin jis ne chhupae hain kai raaz-o-niyaz

sazishen hoti rahin jis pe mohabbat ke KHilaf

aur wo chup hai ugalti hi nahin ek bhi lafz

masala ye hai ki ab kis se gawahi mangun