chu ki lafzi tahqiq

ashnān karne ghar se chale lāla-lāl-chand

aur aage aage laala ke un kī bahū ga.ī

pūchhā jo maiñ ne laala lallā.in kahāñ ga.iiñ

nīchī nazar se kahne lage vo bhī chū ga.ī

maiñ ne diyā javāb unheñ az-rah-e-mazāq

kyā vo bhī koī chhat thī ki bārish se chū ga.ī

kahne lage ki aap bhī haiñ masḳhare ajab

ab tak bhī aap se na tamasḳhur kī ḳhū ga.ī

chū hoshiyār par maiñ nadī se hai ye murād

biibī tamīz bhī haiñ vahīñ karne vuzū ga.ī

maiñ ne kahā ki chū se agar hai murād jū

phir yuuñ kaho ki tā-ba-lab-e-āb-jū ga.ī

kyuuñ aiñThe haiñ maash ke aaTe kī tarah aap

dhotī se aap kī nahīñ haldī kī bū ga.ī

lutf-e-zabāñ se kyā ho sarokār aap ko

dāman ko aap ke nahīñ tahzīb chhū ga.ī

hindī ne aa ke jiim kūche se badal diyā

chū aa.ī kohsār se gulshan se jū ga.ī

lahja huā durusht zabāñ ho ga.ī karaḳht

lutf-e-kalām-o-shistagī-e-guftugū ga.ī

ma.anī ko hai gila ki huā be-hijāb maiñ

shikva hai lafz ko ki mirī aabrū ga.ī

afsos mulk meñ na rahī fārsī kī qadr

mastī uḌī sharāb se phūloñ kī bū ga.ī

ashnan karne ghar se chale lala-lal-chand

aur aage aage lala ke un ki bahu gai

puchha jo main ne lala lallain kahan gain

nichi nazar se kahne lage wo bhi chu gai

main ne diya jawab unhen az-rah-e-mazaq

kya wo bhi koi chhat thi ki barish se chu gai

kahne lage ki aap bhi hain masKHare ajab

ab tak bhi aap se na tamasKHur ki KHu gai

chu hoshiyar par main nadi se hai ye murad

bibi tamiz bhi hain wahin karne wuzu gai

main ne kaha ki chu se agar hai murad ju

phir yun kaho ki ta-ba-lab-e-ab-ju gai

kyun ainThe hain mash ke aaTe ki tarah aap

dhoti se aap ki nahin haldi ki bu gai

lutf-e-zaban se kya ho sarokar aap ko

daman ko aap ke nahin tahzib chhu gai

hindi ne aa ke jim kuche se badal diya

chu aai kohsar se gulshan se ju gai

lahja hua durusht zaban ho gai karaKHt

lutf-e-kalam-o-shistagi-e-guftugu gai

mani ko hai gila ki hua be-hijab main

shikwa hai lafz ko ki meri aabru gai

afsos mulk mein na rahi farsi ki qadr

masti uDi sharab se phulon ki bu gai