mashwara

merī mahbūb ye aañsū haiñ ki motī ruḳh par

un ko is tarah na bekār gañvā maan bhī jā

abhī jalne de ye siina abhī phaTne de dimāġh

ātish-e-ġham ko na ashkoñ se bujhā maan bhī jā

ye nahīñ hai ki maiñ is dard se āgāh nahīñ

tū ġham-e-dahr pe rotī hai patā hai mujh ko

jāntā huuñ maiñ ki is ġham kī haqīqat kyā hai

yahī ġham aur isī shiddat se huā hai mujh ko

haañ magar ham hī nahīñ is ke shikanje ke shikār

apnī hī tarah zamāne meñ hazīñ aur bhī haiñ

apne siine hī nahīñ rañj-o-alam ke madfan

dard ke raaz to poshīda kahīñ aur bhī haiñ

haath par haath dhare sab hoñ agar girya-kunāñ

phir un ashkoñ kā kare kaun mudāvā āḳhir

kis tarah dukh ye Taleñ zaḳhm bhareñ daaġh miTeñ

in tamannāoñ ko de kaun sahārā āḳhir

aaj bebas haiñ to kyā aaj haiñ majbūr to kyā

bebasī hī pe nahīñ ḳhatm kahānī apnī

ġham ke sho.aloñ ko havā de ke agar tez kareñ

rañg lā.egī yahī sho.ala-fishānī apnī

ḳhud-kushī qabr maiñ bhejegī hameñ ġham ko nahīñ

marg-e-hastī meñ kahāñ hai ġham-e-hastī kā ilaaj

qabr meñ lāsheñ hī lāsheñ haiñ tamannāoñ kī

maut ke paas kahāñ apnī ġharībī kā ilaaj

ġham ke zarroñ ko sameTūñ ki baḌe kaam ke haiñ

ye simaT jaa.eñ to ho jaa.e himāla paidā

dard kī aag ko siine meñ vabā rahne do

jab ye bhaḌkegī to kar degī ujālā paidā

meri mahbub ye aansu hain ki moti ruKH par

un ko is tarah na bekar ganwa man bhi ja

abhi jalne de ye sina abhi phaTne de dimagh

aatish-e-gham ko na ashkon se bujha man bhi ja

ye nahin hai ki main is dard se aagah nahin

tu gham-e-dahr pe roti hai pata hai mujh ko

jaanta hun main ki is gham ki haqiqat kya hai

yahi gham aur isi shiddat se hua hai mujh ko

han magar hum hi nahin is ke shikanje ke shikar

apni hi tarah zamane mein hazin aur bhi hain

apne sine hi nahin ranj-o-alam ke madfan

dard ke raaz to poshida kahin aur bhi hain

hath par hath dhare sab hon agar girya-kunan

phir un ashkon ka kare kaun mudawa aaKHir

kis tarah dukh ye Talen zaKHm bharen dagh miTen

in tamannaon ko de kaun sahaara aaKHir

aaj bebas hain to kya aaj hain majbur to kya

bebasi hi pe nahin KHatm kahani apni

gham ke shoalon ko hawa de ke agar tez karen

rang laegi yahi shoala-fishani apni

KHud-kushi qabr main bhejegi hamein gham ko nahin

marg-e-hasti mein kahan hai gham-e-hasti ka ilaj

qabr mein lashen hi lashen hain tamannaon ki

maut ke pas kahan apni gharibi ka ilaj

gham ke zarron ko sameTun ki baDe kaam ke hain

ye simaT jaen to ho jae himala paida

dard ki aag ko sine mein waba rahne do

jab ye bhaDkegi to kar degi ujala paida