chaak

1

vo azal se apne aziim chaak pe

mumkināt ke inkishāf meñ mahv hai

falak-o-zamīñ mah-o-āftāb-o-nujūm kohna karishme us ke kamāl ke

abhī is kī jiddat-e-be-panāh ko tarah-e-nau kī talāsh hai

abhī arsh-o-farsh ke nā-shunīda shamā.il us kī nazar meñ haiñ

abhī māvara-e-ḳhayāl-o-fikr-e-masā.il us kī nazar meñ haiñ

kurra-e-zamīñ ko ye faḳhr hai

ki ye ḳhaak ḳhāliq-e-ḳhāliqāñ ko aziiz hai

yahīñ saañs letī hayāt jalva-numā huī

isī arz-e-ḳhāk ko armuġhān-e-numū milā

yahāñ zindagī ke vo rañg haiñ vo tarīq haiñ

ki na un kā koī shumār hai na hisāb hai

inhī paikaroñ meñ hai jā-ba-jā vo tilism-e-aks-e-jamāl bhī

jise dekh lene se chashm-o-dil hama-hairat-o-hama-be-ḳhudī

kahīñ koñpaloñ ko nikhārtā hai vo lazzat-e-nam-e-shāḳh se

kahīñ mū-qalam se sañvārtā hai guloñ meñ rañg na.e na.e

kabhī baḳhshā hai diloñ ko dard kī jāñ-gudāz latāfateñ

koī rañg ho koī ruup ho

koī shakl koī mizāj ho

sabhī us ke chaak se aa.e haiñ

2

ye saarī bāteñ sach hī sahī

ye saare gumān durust sahī

par ye to kaho

qadmoñ tale rauñde pattoñ kī āvāz sunī hai tum ne kabhī

murjhā.e hue phūloñ se kabhī biitī huī rut kī baat huī

kabhī ḳhauf-zada naḳhchīroñ kī āñkhoñ meñ jhāñk ke dekhā hai

kabhī dukhte diloñ kī us dhaḌkan us dahshat meñ bhī sharīk hue

jo hote hue bhī na hone ke ehsās se paidā hotī hai

phaTī purānī shakloñ vaale

ye apāhij ye ma.azūr za.iif

ye TuuTe phūTe khilaune bhī

usī chaak se aa.e haiñ ki nahīñ

kal jin kī hayāt thī barq-āsā

paivand-e-ḳhas-o-ḳhāshāk hue

jinheñ dekh ke āñkheñ raushan thiiñ

pinhāñ pas-e-parda-e-ḳhāk hue

vo naqsh-gar-e-kāmil hai to phir

jo naqsh-e-jamīl banātā hai

jo dard diloñ meñ jagātā hai

use ġhārat kyuuñ kar detā hai

fankār-e-azal ko kyā apne kisī naqsh pe itminān nahīñ

3

ādmī-zāde kisī rañg kisī naqsh kā pāband na ho

ziist Thahrā huā jouhaḌ nahīñ mavvāj-o-ravāñ dariyā hai

tū hai ik Thahre hue pal meñ talabgār-e-davām

ye davām asl meñ hai be-hisi-e-marg kā naam

ādmī-zāde tire rishte haiñ bādal kī tarah

ghir ke aate haiñ baraste haiñ guzar jaate haiñ

yuuñ bhī hotā hai ki kuchh der Thahar jaate haiñ

yuuñ bhī hotā hai ki bin barse bikhar jaate haiñ

tū kisī rishte kisī abr kā pāband na ho

tū ki hai TuuTe khilaune ke liye girya-kunāñ

dekh ye ḳhaak ke paikar to faqat shakl badal lete haiñ

inhī TuuTe hue bekār khilaunoñ kī ye miTTī phir se

ziist ke chalte hue chaak ke kaam aatī hai

phir na.e ruup meñ Dhal jaatī hai

jaane vāloñ ke liye

miTte rañgoñ ke liye TuuTe khilaunoñ ke liye

terā har nauha bajā hai lekin

aane vāloñ kā banāv bhī to dekh

taaza koñpal kī nazākat meñ tanāv bhī to dekh

ki vo fankār-e-azal

aaj bhī apne usī chaak pe hai

1

wo azal se apne azim chaak pe

mumkinat ke inkishaf mein mahw hai

falak-o-zamin mah-o-aftab-o-nujum kohna karishme us ke kamal ke

abhi is ki jiddat-e-be-panah ko tarah-e-nau ki talash hai

abhi arsh-o-farsh ke na-shunida shamail us ki nazar mein hain

abhi mawara-e-KHayal-o-fikr-e-masail us ki nazar mein hain

kurra-e-zamin ko ye faKHr hai

ki ye KHak KHaliq-e-KHaliqan ko aziz hai

yahin sans leti hayat jalwa-numa hui

isi arz-e-KHak ko armughan-e-numu mila

yahan zindagi ke wo rang hain wo tariq hain

ki na un ka koi shumar hai na hisab hai

inhi paikaron mein hai ja-ba-ja wo tilism-e-aks-e-jamal bhi

jise dekh lene se chashm-o-dil hama-hairat-o-hama-be-KHudi

kahin konpalon ko nikhaarta hai wo lazzat-e-nam-e-shaKH se

kahin mu-qalam se sanwarta hai gulon mein rang nae nae

kabhi baKHsha hai dilon ko dard ki jaan-gudaz latafaten

koi rang ho koi rup ho

koi shakl koi mizaj ho

sabhi us ke chaak se aae hain

2

ye sari baaten sach hi sahi

ye sare guman durust sahi

par ye to kaho

qadmon tale raunde patton ki aawaz suni hai tum ne kabhi

murjhae hue phulon se kabhi biti hui rut ki baat hui

kabhi KHauf-zada naKHchiron ki aankhon mein jhank ke dekha hai

kabhi dukhte dilon ki us dhaDkan us dahshat mein bhi sharik hue

jo hote hue bhi na hone ke ehsas se paida hoti hai

phaTi purani shaklon wale

ye apahij ye mazur zaif

ye TuTe phuTe khilaune bhi

usi chaak se aae hain ki nahin

kal jin ki hayat thi barq-asa

paiwand-e-KHas-o-KHashak hue

jinhen dekh ke aankhen raushan thin

pinhan pas-e-parda-e-KHak hue

wo naqsh-gar-e-kaamil hai to phir

jo naqsh-e-jamil banata hai

jo dard dilon mein jagata hai

use ghaarat kyun kar deta hai

fankar-e-azal ko kya apne kisi naqsh pe itminan nahin

3

aadmi-zade kisi rang kisi naqsh ka paband na ho

zist Thahra hua jouhaD nahin mawwaj-o-rawan dariya hai

tu hai ek Thahre hue pal mein talabgar-e-dawam

ye dawam asl mein hai be-hisi-e-marg ka nam

aadmi-zade tere rishte hain baadal ki tarah

ghir ke aate hain baraste hain guzar jate hain

yun bhi hota hai ki kuchh der Thahar jate hain

yun bhi hota hai ki bin barse bikhar jate hain

tu kisi rishte kisi abr ka paband na ho

tu ki hai TuTe khilaune ke liye girya-kunan

dekh ye KHak ke paikar to faqat shakl badal lete hain

inhi TuTe hue bekar khilaunon ki ye miTTi phir se

zist ke chalte hue chaak ke kaam aati hai

phir nae rup mein Dhal jati hai

jaane walon ke liye

miTte rangon ke liye TuTe khilaunon ke liye

tera har nauha baja hai lekin

aane walon ka banaw bhi to dekh

taza konpal ki nazakat mein tanaw bhi to dekh

ki wo fankar-e-azal

aaj bhi apne usi chaak pe hai