chand aur suraj

abr-e-siyah kī farsūda vo chādar

tārīk rakhtī kab tak ye manzar

tal.at pe zulmat kyā ġhālib aatī

khulte na kab tak fitrat ke jauhar

dāman ghaTā kā ḳhud chaak karke

dekho vo niklā māh-e-munavvar

ye ḳhaas maz.har mahr-e-mubīñ kā

kitnā hasīñ hai allāhu-akbar

jo ruup is kā vo ruup us kā

itnā mushābah chehra hai kis kā

maz.har jalālī maz.har jamālī

donoñ kī sūrat hai bholī bhālī

donoñ subuk-ravāñ kī ravish se

zāhir nahīñ hai āshufta haalī

tābinda un ke faiz-e-asar se

bazm-e-ḳhayālī bazm-e-misālī

din is se tābāñ raat is se raushan

zarkār-e-sanad kab dekhī ḳhālī

nazreñ haiñ un par husn-e-atam kī

jalvoñ se us ke shaan un kī chamkī

ḳhūbī se koī kab hai muarra

qudrat kā shāhid hai zarra zarra

lekin hai un kī shaan aur hī kuchh

arz-o-samā ko hai un pe ġharra

aa.e gahan meñ bhī ye to kyā ġham

zaat in kī zulmat se hai mubarrā

haiñ mere roz-o-shab un se dilkash

hotā huuñ un se ḳhush roz-marra

kahtī hai ishrat merī nazar kī

le lo balā.eñ shams-o-qamar kī

ḳhush-kun jab un kā jāh-o-hasham ho

zauq-e-nazar phir kyoñ merā kam ho

bāliġh-nazar hoñ us se na kyoñ ḳhush

kul nūriyoñ kī zau jis meñ zam ho

hoñ dīda-var kyoñ is se na shādāñ

tāroñ kā baaqī jis se bharam ho

un kī numūd-e-zulmat-rubā par

partav-fagan jab nūr-e-qadam ho

ho chāñd maddham yā maañd sūraj

chamkeñge yūñhī ye chāñd sūraj

abr-e-siyah ki farsuda wo chadar

tarik rakhti kab tak ye manzar

talat pe zulmat kya ghaalib aati

khulte na kab tak fitrat ke jauhar

daman ghaTa ka KHud chaak karke

dekho wo nikla mah-e-munawwar

ye KHas mazhar mahr-e-mubin ka

kitna hasin hai allahu-akbar

jo rup is ka wo rup us ka

itna mushabah chehra hai kis ka

mazhar jalali mazhar jamali

donon ki surat hai bholi bhaali

donon subuk-rawan ki rawish se

zahir nahin hai aashufta haali

tabinda un ke faiz-e-asar se

bazm-e-KHayali bazm-e-misali

din is se taban raat is se raushan

zarkar-e-sanad kab dekhi KHali

nazren hain un par husn-e-atam ki

jalwon se us ke shan un ki chamki

KHubi se koi kab hai muarra

qudrat ka shahid hai zarra zarra

lekin hai un ki shan aur hi kuchh

arz-o-sama ko hai un pe gharra

aae gahan mein bhi ye to kya gham

zat in ki zulmat se hai mubarra

hain mere roz-o-shab un se dilkash

hota hun un se KHush roz-marra

kahti hai ishrat meri nazar ki

le lo balaen shams-o-qamar ki

KHush-kun jab un ka jah-o-hasham ho

zauq-e-nazar phir kyon mera kam ho

baaligh-nazar hon us se na kyon KHush

kul nuriyon ki zau jis mein zam ho

hon dida-war kyon is se na shadan

taron ka baqi jis se bharam ho

un ki numud-e-zulmat-ruba par

partaw-fagan jab nur-e-qadam ho

ho chand maddham ya mand suraj

chamkenge yunhi ye chand suraj