chand ka husn

maiñ ne maanā ki faqat Dher chaTānoñ kā hai chāñd

us ke andar gul-o-nasrīñ kā nazārā na sahī

chāñd ke husn meñ vaaq.e na huī koī kamī

us ke andar kisī lailā kā ishārā na sahī

ḳhār-o-maidāñ haiñ kahīñ aur kahīñ sang-o-reg

chāñd ke gird havā hai na hai us meñ paanī

chāñd kī dilbarī in bātoñ se kuchh kam na huī

chāñd is vaqt bhī ra.anā.ī meñ hai lā-sānī

ma.arka sar kiyā amrīkī ḳhalā-bāzoñ ne

is haqīqat se to inkār nahīñ hai mujh ko

chāñd ke husn kā un logoñ ne parda kiyā chaak

is ġhalat baat kā iqrār nahīñ hai mujh ko

chāñd ke dasht meñ insān ne kī hai tahqīq

kholā hai chāñd pe tahrīk-o-amal kā nayā baab

ḳhāk-e-mahtāb meñ insāñ ko nazar aa.ī namī

kam huā kis tarah in bātoñ se husn-e-mahtāb

baat ye sach hai ki tārīḳh meñ bār-e-avval

chāñd kī satah pe insāñ ne qadam rakkhā hai

chāñd kī bazm meñ insāñ ne kiyā ḳhurd-o-nosh

is ne le jā ke vahāñ apnā alam rakkhā hai

lekin is fat.h se kuchh kam na huā chāñd kā husn

charḳh pe chāñd kī turkāna ravish hai ab bhī

chāñdnī raat usī tarah hai farhat-angez

chāñdnī raat meñ pahlī sī kashish hai ab bhī

ye to ma.alūm thā pahle hī se ham logoñ ko

mah-e-kāmil kī ziyā kā hai koī aur kafīl

is haqīqat se ham āgāh bahut pahle the

chāñd kī raushnī sūraj hī kā hai aks-e-jamīl

phir bhī ham chāñd ko kahte hī rahe paikar-e-nūr

us kī ra.anā.ī pe har vaqt rahe ham shaidā

kī atā us ne taḳhayyul ko ru-pahlī parvāz

us ke ik naam se lākhoñ hue mazmūñ paidā

ab bhī ham chāñd meñ karte haiñ tabassum mahsūs

āriz-e-māh meñ hai phuul kā rū-e-ḳhandāñ

ab bhī mahtāb ke lau dete hue chehre par

kisī mahbūb ke ruḳhsār kā hotā hai gumāñ

lākhoñ chīzeñ haiñ hasīñ mahfil-e-duniyā meñ magar

aisī shai mil nahīñ saktī hai kahīñ se ham ko

chāñd bad-shakl hai dekheñ jo ḳhalā meñ jā kar

chāñd lagtā hai hasīñ ab bhī zamīñ se ham ko

main ne mana ki faqat Dher chaTanon ka hai chand

us ke andar gul-o-nasrin ka nazara na sahi

chand ke husn mein waqe na hui koi kami

us ke andar kisi laila ka ishaara na sahi

KHar-o-maidan hain kahin aur kahin sang-o-reg

chand ke gird hawa hai na hai us mein pani

chand ki dilbari in baaton se kuchh kam na hui

chand is waqt bhi ranai mein hai la-sani

marka sar kiya amriki KHala-bazon ne

is haqiqat se to inkar nahin hai mujh ko

chand ke husn ka un logon ne parda kiya chaak

is ghalat baat ka iqrar nahin hai mujh ko

chand ke dasht mein insan ne ki hai tahqiq

khola hai chand pe tahrik-o-amal ka naya bab

KHak-e-mahtab mein insan ko nazar aai nami

kam hua kis tarah in baaton se husn-e-mahtab

baat ye sach hai ki tariKH mein bar-e-awwal

chand ki satah pe insan ne qadam rakkha hai

chand ki bazm mein insan ne kiya KHurd-o-nosh

is ne le ja ke wahan apna alam rakkha hai

lekin is fath se kuchh kam na hua chand ka husn

charKH pe chand ki turkana rawish hai ab bhi

chandni raat usi tarah hai farhat-angez

chandni raat mein pahli si kashish hai ab bhi

ye to malum tha pahle hi se hum logon ko

mah-e-kaamil ki ziya ka hai koi aur kafil

is haqiqat se hum aagah bahut pahle the

chand ki raushni suraj hi ka hai aks-e-jamil

phir bhi hum chand ko kahte hi rahe paikar-e-nur

us ki ranai pe har waqt rahe hum shaida

ki ata us ne taKHayyul ko ru-pahli parwaz

us ke ek nam se lakhon hue mazmun paida

ab bhi hum chand mein karte hain tabassum mahsus

aariz-e-mah mein hai phul ka ru-e-KHandan

ab bhi mahtab ke lau dete hue chehre par

kisi mahbub ke ruKHsar ka hota hai guman

lakhon chizen hain hasin mahfil-e-duniya mein magar

aisi shai mil nahin sakti hai kahin se hum ko

chand bad-shakl hai dekhen jo KHala mein ja kar

chand lagta hai hasin ab bhi zamin se hum ko