chand ke tamannai

shahr-e-dil kī galiyoñ meñ

shaam se bhaTakte haiñ

chāñd ke tamannā.ī

be-qarār saudā.ī

dil-gudāz tārīkī

rūh-o-jāñ ko Dastī hai

rūh-o-jāñ meñ bastī hai

shahr-e-dil kī galiyoñ meñ

taak shab kī beloñ par

shabnamīñ sarishkoñ kī

be-qarār logoñ ne

be-shumār logoñ ne

yādgār chhoḌī hai

itnī baat thoḌī hai

sad hazār bāteñ thiiñ

hīla-e-shakebā.ī

sūratoñ kī zebā.ī

qāmatoñ kī ra.anā.ī

in siyāh rātoñ meñ

ek bhī na yaad aa.ī

jā-ba-jā bhaTakte haiñ

kis kī raah takte haiñ

chāñd ke tamannā.ī

ye nagar kabhī pahle

is qadar na vīrāñ thā

kahne vaale kahte haiñ

qarya-e-nigārāñ thā

ḳhair apne jiine kā

ye bhī ek sāmāñ thā

aaj dil meñ vīrānī

abr ban ke ghir aa.ī

aaj dil ko kyā kahiye

bā-vafā na harjā.ī

phir bhī log dīvāne

aa ga.e haiñ samjhāne

apnī vahshat-e-dil ke

bun liye haiñ afsāne

ḳhush-ḳhayāl duniyā ne

garmiyāñ to jaatī haiñ

vo ruteñ bhī ātīñ haiñ

jab malūl rātoñ meñ

dostoñ kī bātoñ meñ

jī na chain pā.egā

aur uub jā.egā

āhaToñ se gūñjegī

shahr-e-dil kī pahnā.ī

aur chāñd rātoñ meñ

chāñdnī ke shaidā.ī

har bahāne nikleñge

āzmāne nikleñge

aarzū kī gahrā.ī

DhūñDne ko rusvā.ī

sard sard rātoñ ko

zard chāñd baḳhshegā

be-hisāb tanhā.ī

be-hijāb tanhā.ī

shahr-e-dil kī galiyoñ meñ

shahr-e-dil ki galiyon mein

sham se bhaTakte hain

chand ke tamannai

be-qarar saudai

dil-gudaz tariki

ruh-o-jaan ko Dasti hai

ruh-o-jaan mein basti hai

shahr-e-dil ki galiyon mein

tak shab ki belon par

shabnamin sarishkon ki

be-qarar logon ne

be-shumar logon ne

yaadgar chhoDi hai

itni baat thoDi hai

sad hazar baaten thin

hila-e-shakebai

suraton ki zebai

qamaton ki ranai

in siyah raaton mein

ek bhi na yaad aai

ja-ba-ja bhaTakte hain

kis ki rah takte hain

chand ke tamannai

ye nagar kabhi pahle

is qadar na viran tha

kahne wale kahte hain

qarya-e-nigaran tha

KHair apne jine ka

ye bhi ek saman tha

aaj dil mein virani

abr ban ke ghir aai

aaj dil ko kya kahiye

ba-wafa na harjai

phir bhi log diwane

aa gae hain samjhane

apni wahshat-e-dil ke

bun liye hain afsane

KHush-KHayal duniya ne

garmiyan to jati hain

wo ruten bhi aatin hain

jab malul raaton mein

doston ki baaton mein

ji na chain paega

aur ub jaega

aahaTon se gunjegi

shahr-e-dil ki pahnai

aur chand raaton mein

chandni ke shaidai

har bahane niklenge

aazmane niklenge

aarzu ki gahrai

DhunDne ko ruswai

sard sard raaton ko

zard chand baKHshega

be-hisab tanhai

be-hijab tanhai

shahr-e-dil ki galiyon mein