chand sultana

uḳhuvvat ke parastāroñ kī ik rañgīn duniyā thī

harīm-e-nūr-o-naġhma bazm-e-nāhīd-o-surayyā thī

vo duniyā sham-e-āzādī ke parvānoñ kī bastī thī

jahāñ fitrat sañvartī thī jahāñ mastī barastī thī

vo duniyā zindagī ke phuul barsātī huī duniyā

mulā.em nuzhatoñ kī raqs farmātī huī duniyā

jahāñ ik saañs bhī lene se ghabrāte the hañgāme

jalāl-e-be-amāñ se Dar ke so jaate the hañgāme

vo duniyā rashk-e-firdaus-e-barīñ ma.alūm hotī thī

ḳhudā kā shāhkār-e-behtarīñ ma.alūm hotī thī

jahāñ ishq-o-junūñ husn-o-vafā kī rājdhānī thī

mohabbat masnad-ārā thī mohabbat pur-javānī thī

jahāñ īsār-o-ḳhuddārī ke parcham lahlahāte the

jahāñ ma.asūm bachche maut se āñkheñ laḌāte the

musalsal bāda-e-asūdagī ke daur chalte the

lahū se parvarish paa.e hue armāñ nikalte the

adū jis kā ḳharāb-e-ġham shikār-e-nā-murādī thā

har ik sāhil-nashīñ jāñ-soz tūfānoñ kā aadī thā

vahī gulshan ab ik vīrāna-e-ābad hai goyā

ġhilāf-e-sāz meñ lipTī huī fariyād hai goyā

abhī qile kī dīvāroñ meñ vo anvār baaqī haiñ

tire zauq-e-tapish ke muzmahil āsār baaqī haiñ

ye dīvāreñ tirī jur.at kā afsāna sunātī haiñ

hanūz us meñ himāla kī adā.eñ paa.ī jaatī haiñ

hanūz in sarfaroshoñ ke tarāne haiñ fazāoñ meñ

tirī āvāz-e-pā mahfūz hai ab tak havāoñ meñ

dil-e-vīrāñ ko muddat se hai terā intizār aa jā

ḳhudārā ai bahādur inqilābī shahsavār aa jā

uKHuwwat ke parastaron ki ek rangin duniya thi

harim-e-nur-o-naghma bazm-e-nahid-o-surayya thi

wo duniya sham-e-azadi ke parwanon ki basti thi

jahan fitrat sanwarti thi jahan masti barasti thi

wo duniya zindagi ke phul barsati hui duniya

mulaem nuzhaton ki raqs farmati hui duniya

jahan ek sans bhi lene se ghabraate the hangame

jalal-e-be-aman se Dar ke so jate the hangame

wo duniya rashk-e-firdaus-e-barin malum hoti thi

KHuda ka shahkar-e-behtarin malum hoti thi

jahan ishq-o-junun husn-o-wafa ki rajdhani thi

mohabbat masnad-ara thi mohabbat pur-jawani thi

jahan isar-o-KHuddari ke parcham lahlahate the

jahan masum bachche maut se aankhen laDate the

musalsal baada-e-asudagi ke daur chalte the

lahu se parwarish pae hue arman nikalte the

adu jis ka KHarab-e-gham shikar-e-na-muradi tha

har ek sahil-nashin jaan-soz tufanon ka aadi tha

wahi gulshan ab ek virana-e-abad hai goya

ghilaf-e-saz mein lipTi hui fariyaad hai goya

abhi qile ki diwaron mein wo anwar baqi hain

tere zauq-e-tapish ke muzmahil aasar baqi hain

ye diwaren teri jurat ka afsana sunati hain

hanuz us mein himala ki adaen pai jati hain

hanuz in sarfaroshon ke tarane hain fazaon mein

teri aawaz-e-pa mahfuz hai ab tak hawaon mein

dil-e-viran ko muddat se hai tera intizar aa ja

KHudara ai bahadur inqilabi shahsawar aa ja