chandni raat mein

aur maiñ chāñdnī raat meñ so gayā

dekhtā kyā huuñ

phailī huī chāñdnī ke kināre kināre

ka.ī barq-raftār parchhā.iyāñ

jaane kab se ta.āqub-kunāñ

samt-e-nā-āshnā kī taraf haiñ ravāñ

aur maiñ āhista āhista aage baḌhā

rāhgīroñ se dāman bachātā huā

hadd-e-āfāq se jab guzarne lagā

dekhtā kyā huuñ

ik be-karāñ bahr hai āsmāñ se zamīñ tak muhīt

jis meñ har sāya-e-tez-rau Duub kar

dhaar letā hai bhīge ujāle kā ruup

maiñ bhī Duubā huuñ is bahr meñ bār-hā

chāñdnī kī jhalak bhī na paa.ī kahīñ

jism o jaañ kī siyāhī ubhartī rahī

aur har baar tārīk māhaul meñ

aañkh khultī rahī

chāñdnī raat meñ!!

aur main chandni raat mein so gaya

dekhta kya hun

phaili hui chandni ke kinare kinare

kai barq-raftar parchhaiyan

jaane kab se taaqub-kunan

samt-e-na-ashna ki taraf hain rawan

aur main aahista aahista aage baDha

rahgiron se daman bachata hua

hadd-e-afaq se jab guzarne laga

dekhta kya hun

ek be-karan bahr hai aasman se zamin tak muhit

jis mein har saya-e-tez-rau Dub kar

dhaar leta hai bhige ujale ka rup

main bhi Duba hun is bahr mein bar-ha

chandni ki jhalak bhi na pai kahin

jism o jaan ki siyahi ubharti rahi

aur har bar tarik mahaul mein

aankh khulti rahi

chandni raat mein!!