chaqu ka dasta

maiñ abhī chhoTā thā

kisī ne mere haath meñ chāqū thamā diyā

maiñ ne apnī umr kī lakīr ko

chhe jagah se kaaT Daalā

aur mohabbat kī lakīr

chāqū kī nok se khurach dī

chāqū kā dasta mujhe kuchh be-hañgam sā mahsūs huā

use maiñ ne

hathauḌe kī zarb se

chāqū se alāhida kar diyā

zarā sī dhaar lagāne ke ba.ad

ab use donoñ taraf se isti.māl kiyā jā saktā thā

mujhe yaad nahīñ

maiñ ne use kitnī jagah isti.māl kiyā hogā

albatta us se merī hatheliyoñ par

ka.ī be sī lakīreñ paḌ ga.iiñ

aur ek haath kī tamām uñgliyāñ

talaf ho ga.iiñ

hathelī kī be-zarūrat lakīroñ ne

merī ba.ad kī zindagī meñ

ka.ī mushkilāt paidā kiiñ

sab se baḌī mushkil

to ḳhud ye chāqū thā

jo apnī do tarfa dhaar se

mujhe zaḳhmī kar rahā thā

ek mushkil aur hai

aisā hī ek chāqū

ek din aa.ine meñ mere aks ko

do masāvī TukḌoñ meñ taqsīm kar gayā

aur maiñ Thiik se ye bhī na dekh sakā

ki us kā dasta kis ke haath meñ thā

main abhi chhoTa tha

kisi ne mere hath mein chaqu thama diya

main ne apni umr ki lakir ko

chhe jagah se kaT Dala

aur mohabbat ki lakir

chaqu ki nok se khurach di

chaqu ka dasta mujhe kuchh be-hangam sa mahsus hua

use main ne

hathauDe ki zarb se

chaqu se alahida kar diya

zara si dhaar lagane ke baad

ab use donon taraf se istimal kiya ja sakta tha

mujhe yaad nahin

main ne use kitni jagah istimal kiya hoga

albatta us se meri hatheliyon par

kai be si lakiren paD gain

aur ek hath ki tamam ungliyan

talaf ho gain

hatheli ki be-zarurat lakiron ne

meri baad ki zindagi mein

kai mushkilat paida kin

sab se baDi mushkil

to KHud ye chaqu tha

jo apni do tarfa dhaar se

mujhe zaKHmi kar raha tha

ek mushkil aur hai

aisa hi ek chaqu

ek din aaine mein mere aks ko

do masawi TukDon mein taqsim kar gaya

aur main Thik se ye bhi na dekh saka

ki us ka dasta kis ke hath mein tha