chait

ye haqīqat hai kabhī phāgun ke gun gaate the ham

chait kī aamad huī baaqī nahīñ ab is kā ġham

holī guzrī chait aayā le ke garmī kā payām

ruḳhsatī jaaḌe kī hai bhārat se kartā hai salām

halkī ThanDak ab rahegī kuchh dinoñ tak sub.h-o-shām

jaaḌe garmī kā ye daura hotā rahtā hai mudām

saal meñ har ek mausam kā maza ik baar hai

is liye phūloñ phaloñ kī hind meñ bhar-mār hai

khet meñ gehūñ ke paudoñ ne dikhā.ī hai bahār

kuchh dinoñ pahle the dhānī ab sunahrī hai qatār

thā kisānoñ ko isī mausam kā kab se intizār

fasl kī ummīd meñ aayā hai chehroñ par nikhār

bhuuk se kumhlā.e chehroñ par bhī laalī aa ga.ī

hai masarrat vaqt se pahle divālī aa ga.ī

tiij tyauhāroñ pe har ik bhārtī qurbān hai

in ke kāran fāqa-mastī meñ guzar āsān hai

ye na hoñ to aadmī kī zindagī vīrān hai

bhārtī tahzīb kī ye rang-o-mastī jaan hai

jab fazā gaañv kī guuñj uThtī hai chaitī-gān se

muskurātī hai ye dhartī bhī madhur muskān se

ye haqiqat hai kabhi phagun ke gun gate the hum

chait ki aamad hui baqi nahin ab is ka gham

holi guzri chait aaya le ke garmi ka payam

ruKHsati jaDe ki hai bhaarat se karta hai salam

halki ThanDak ab rahegi kuchh dinon tak subh-o-sham

jaDe garmi ka ye daura hota rahta hai mudam

sal mein har ek mausam ka maza ek bar hai

is liye phulon phalon ki hind mein bhar-mar hai

khet mein gehun ke paudon ne dikhai hai bahaar

kuchh dinon pahle the dhani ab sunahri hai qatar

tha kisanon ko isi mausam ka kab se intizar

fasl ki ummid mein aaya hai chehron par nikhaar

bhuk se kumhlae chehron par bhi lali aa gai

hai masarrat waqt se pahle diwali aa gai

tij tyauhaaron pe har ek bhaarti qurban hai

in ke karan faqa-masti mein guzar aasan hai

ye na hon to aadmi ki zindagi viran hai

bhaarti tahzib ki ye rang-o-masti jaan hai

jab faza ganw ki gunj uThti hai chaiti-gan se

muskuraati hai ye dharti bhi madhur muskan se