chakle

raat ga.e tak ghā.el naġhme karte haiñ elaan yahāñ

ye duniyā hai sañg-diloñ kī koī nahīñ insān yahāñ

izzat vāloñ kī zillat kā sab se baḌā bāzār hai ye

chukte haiñ ġhairat ke saude bikte haiñ īmān yahāñ

bhiik meñ bhī māñgo to koī pyaar na Daale jholī meñ

bin māñge mil jaate haiñ rusvā.ī ke sāmān yahāñ

zar-dāroñ ko naġhmoñ meñ jab jism dikhā.ī detā hai

ek mahaktī sej pe akasr TūTtī hai har taan yahāñ

mamtā ke hoñToñ par jab chāñdī kī mohreñ lagtī haiñ

maañ ḳhud apnī beTī ko kar detī hai qurbān yahāñ

apnā ḳhuun hī baḌh kar apne ḳhuun kī bolī detā hai

kis ne kis par haath baḌhāyā koī nahīñ pahchān yahāñ

paap ke is mandir meñ kyā kyā bhaav batā.e rām-janī

shaam Dhale jab aan birājeñ sone ke bhagvān yahāñ

raat ga.e tak jaage sāñvlī kaale choroñ kī ḳhātir

aur agar inkār kare kahlā.e nā-farmān yahāñ

jhilmil kartī poshākoñ se chāhe badbū aatī ho

ḳhud jal kar mahfil ko ḳhushbū detā hai lobān yahāñ

raat gae tak ghael naghme karte hain elan yahan

ye duniya hai sang-dilon ki koi nahin insan yahan

izzat walon ki zillat ka sab se baDa bazar hai ye

chukte hain ghairat ke saude bikte hain iman yahan

bhik mein bhi mango to koi pyar na Dale jholi mein

bin mange mil jate hain ruswai ke saman yahan

zar-daron ko naghmon mein jab jism dikhai deta hai

ek mahakti sej pe akasr TuTti hai har tan yahan

mamta ke honTon par jab chandi ki mohren lagti hain

man KHud apni beTi ko kar deti hai qurban yahan

apna KHun hi baDh kar apne KHun ki boli deta hai

kis ne kis par hath baDhaya koi nahin pahchan yahan

pap ke is mandir mein kya kya bhaw batae ram-jani

sham Dhale jab aan birajen sone ke bhagwan yahan

raat gae tak jage sanwli kale choron ki KHatir

aur agar inkar kare kahlae na-farman yahan

jhilmil karti poshakon se chahe badbu aati ho

KHud jal kar mahfil ko KHushbu deta hai loban yahan