chal aa ek aisi nazm kahun

chal aa ik aisī nazm kahūñ

jo lafz kahūñ vo ho jaa.e

bas ashk kahūñ to ik aañsū

tire gore gaal ko dho jaa.e

maiñ aa likkhūñ tū aa jaa.e

maiñ baiTh likhūñ tū aa baiThe

mire shāne par sar rakkhe tū

maiñ niiñd kahūñ tū so jaa.e

maiñ kāġhaz par tire hoñT likhūñ

tire hoñToñ par muskān aa.e

maiñ dil likkhūñ tū dil thāme

maiñ gum likkhūñ dil kho jaa.e

tire haath banā.ūñ pencil se

phir haath pe tere haath rakhūñ

kuchh ulTā sīdhā farz karūñ

kuchh sīdhā ulTā ho jaa.e

maiñ aah likhūñ tū haa.e kare

bechain likhūñ bechain ho tū

phir maiñ bechain kā be kāTūñ

tujhe chain zarā sā ho jaa.e

abhī 'ain likhūñ tū soche mujhe

phir shiin likhūñ tirī niiñd uḌe

jab qaaf likhūñ tujhe kuchh kuchh ho

maiñ 'ishq likhūñ tujhe ho jaa.e

chal aa ek aisi nazm kahun

jo lafz kahun wo ho jae

bas ashk kahun to ek aansu

tere gore gal ko dho jae

main aa likkhun tu aa jae

main baiTh likhun tu aa baiThe

mere shane par sar rakkhe tu

main nind kahun tu so jae

main kaghaz par tere honT likhun

tere honTon par muskan aae

main dil likkhun tu dil thame

main gum likkhun dil kho jae

tere hath banaun pencil se

phir hath pe tere hath rakhun

kuchh ulTa sidha farz karun

kuchh sidha ulTa ho jae

main aah likhun tu hae kare

bechain likhun bechain ho tu

phir main bechain ka be kaTun

tujhe chain zara sa ho jae

abhi 'ain likhun tu soche mujhe

phir shin likhun teri nind uDe

jab qaf likhun tujhe kuchh kuchh ho

main 'ishq likhun tujhe ho jae