چل آ اک ایسی نظم کہوں

چل آ اک ایسی نظم کہوں

جو لفظ کہوں وہ ہو جائے

بس اشک کہوں تو اک آنسو

ترے گورے گال کو دھو جائے

میں آ لکھوں تو آ جائے

میں بیٹھ لکھوں تو آ بیٹھے

مرے شانے پر سر رکھے تو

میں نیند کہوں تو سو جائے

میں کاغذ پر ترے ہونٹ لکھوں

ترے ہونٹوں پر مسکان آئے

میں دل لکھوں تو دل تھامے

میں گم لکھوں دل کھو جائے

ترے ہاتھ بناؤں پنسل سے

پھر ہاتھ پہ تیرے ہاتھ رکھوں

کچھ الٹا سیدھا فرض کروں

کچھ سیدھا الٹا ہو جائے

میں آہ لکھوں تو ہائے کرے

بے چین لکھوں بے چین ہو تو

پھر میں بے چین کا ب کاٹوں

تجھے چین ذرا سا ہو جائے

ابھی ع لکھوں تو سوچے مجھے

پھر شین لکھوں تری نیند اڑے

جب ق لکھوں تجھے کچھ کچھ ہو

میں عشق لکھوں تجھے ہو جائے