chala aata hai KHud anjam se anjaan hai bakra

chalā aatā hai ḳhud anjām se anjān hai bakrā

nahīñ hargiz nahīñ kis ne kahā nādān hai bakrā

jo sach pūchho to is ruḳh se vo ham logoñ se behtar hai

ki apne ḳhāliq o mālik pe ḳhud qurbān hai bakrā

haqīqat meñ vahī bakrā hai achchhā dekh kar jis ko

qasā.ī ki uThe farba hai ālī-shān hai bakrā

bhalā tujh tak pahuñch sakte haiñ ham insān ab kyūñkar

hamāre ghar tū aayā hai tirā ehsān hai bakrā

qasā.ī kī zarūrat hī nahīñ hai ba.az bakroñ ko

chhurī ko dekh kar ḳhud aap hī qurbān hai bakrā

dehātī log bhī allāh-miyāñ kī gaa.e haiñ goyā

ki bakre par likhā hai made-in-jāpān hai bakrā

mire abbū mujhe dilvā.iye bakrā bahar-sūrat

mirī ḳhvāhish hai qurbānī mirā armān hai bakrā

labāda surḳh oḌhe taḳht par baiThā hai naḳhvat se

ki aalā nasl kā hai aur ālī-shān hai bakrā

lagā manDī pahuñch kar ashraf-ul-maḳhlūq haiñ bakre

huā insān ko mahsūs ḳhud insān hai bakrā

chala aata hai KHud anjam se anjaan hai bakra

nahin hargiz nahin kis ne kaha nadan hai bakra

jo sach puchho to is ruKH se wo hum logon se behtar hai

ki apne KHaliq o malik pe KHud qurban hai bakra

haqiqat mein wahi bakra hai achchha dekh kar jis ko

qasai ki uThe farba hai aali-shan hai bakra

bhala tujh tak pahunch sakte hain hum insan ab kyunkar

hamare ghar tu aaya hai tera ehsan hai bakra

qasai ki zarurat hi nahin hai baz bakron ko

chhuri ko dekh kar KHud aap hi qurban hai bakra

dehati log bhi allah-miyan ki gae hain goya

ki bakre par likha hai made-in-japan hai bakra

mere abbu mujhe dilwaiye bakra bahar-surat

meri KHwahish hai qurbani mera arman hai bakra

labaada surKH oDhe taKHt par baiTha hai naKHwat se

ki aala nasl ka hai aur aali-shan hai bakra

laga manDi pahunch kar ashraf-ul-maKHluq hain bakre

hua insan ko mahsus KHud insan hai bakra