chale aana

ye sach hai tum jahāñ ho vo jagah jannat kī mānind hai

vahāñ ke nuqra.ī din meñ

divālī jaisī rāteñ haiñ

sunahrī zindagī kā lamha lamha jagmagātā hai

magar shāyad kisī pal ke kisī nanhe se lamhe meñ

agar chhū kar guzar jaa.e tumheñ mamtā kā ik jhoñkā

agar maañ kī mohabbat ashk ban kar aañkh chhalkā.e

guzishta saath guzrī sā.atoñ kī yaad aa jaa.e

to phir beTo

tum apne des lauT aanā

ki jab bhī shaam Dhaltī hai

to sab uḌte parinde lauT aate haiñ

thake dahqāñ apnī bastiyoñ kī samt aate haiñ

musāfir lauT aate haiñ

gharauñde jagmagāte haiñ

suno beTo

agar in vāpsī ke isti.āroñ kā koī pahlū

tumheñ bhī muzmahil kar de

to phir tum bhī

palaT aane kā koī rāsta imkān meñ rakhnā

ki maañ kī muntazar raste kī taktī

chashm-e-pur-nam dhyān rakhnā

ye sach hai tum jahan ho wo jagah jannat ki manind hai

wahan ke nuqrai din mein

diwali jaisi raaten hain

sunahri zindagi ka lamha lamha jagmagata hai

magar shayad kisi pal ke kisi nanhe se lamhe mein

agar chhu kar guzar jae tumhein mamta ka ek jhonka

agar man ki mohabbat ashk ban kar aankh chhalkae

guzishta sath guzri saaton ki yaad aa jae

to phir beTo

tum apne des lauT aana

ki jab bhi sham Dhalti hai

to sab uDte parinde lauT aate hain

thake dahqan apni bastiyon ki samt aate hain

musafir lauT aate hain

gharaunde jagmagate hain

suno beTo

agar in wapsi ke istiaron ka koi pahlu

tumhein bhi muzmahil kar de

to phir tum bhi

palaT aane ka koi rasta imkan mein rakhna

ki man ki muntazar raste ki takti

chashm-e-pur-nam dhyan rakhna