chale bhi aao

vo muntazir haiñ kisī kī āñkheñ

vo raat Dhalne ko aa ga.ī hai

vo chāñd maddham sā lag rahā hai

sitāre be-nūr ho rahe haiñ

saverā añgḌā.ī le rahā hai

kisī kī bāheñ pukārtī haiñ

chale bhī aao chale bhī aao

vo taab ham meñ kahāñ hai baaqī

ki furqatoñ ke azaab jheleñ

vo hausle aur vo valvale sab

bikhar rahe haiñ bikhar rahe haiñ

tamām ehsās mar rahe haiñ

ab is se pahle ki maut aa.e

chale bhī aao chale bhī aao

vahī ġhamoñ kā hujūm phir hai

vahī hai mausam judā.iyoñ kā

vahī hai tīra-shabī kā manzar

vahī sisaktī sī aarzū hai

ki phir vo pahlī sī zindagī se

sahārā bāhoñ kā phir se de do

chale bhī aao chale bhī aao

hai ḳhushk pattoñ sī apnī hālat

havā ke rahm-o-karam pe haiñ ham

na ham ko rāhoñ kā kuchh pata hai

na manziloñ kī ḳhabar hai ham ko

kahāñ kahāñ ham liye phireñge

uThā.e is zindagī kā lāsha

chalāo nazroñ se tiir ham par

hameñ ajal kī ġhizā banā do

chale bhī aao chale bhī aao

wo muntazir hain kisi ki aankhen

wo raat Dhalne ko aa gai hai

wo chand maddham sa lag raha hai

sitare be-nur ho rahe hain

sawera angDai le raha hai

kisi ki bahen pukarti hain

chale bhi aao chale bhi aao

wo tab hum mein kahan hai baqi

ki furqaton ke azab jhelen

wo hausle aur wo walwale sab

bikhar rahe hain bikhar rahe hain

tamam ehsas mar rahe hain

ab is se pahle ki maut aae

chale bhi aao chale bhi aao

wahi ghamon ka hujum phir hai

wahi hai mausam judaiyon ka

wahi hai tira-shabi ka manzar

wahi sisakti si aarzu hai

ki phir wo pahli si zindagi se

sahaara bahon ka phir se de do

chale bhi aao chale bhi aao

hai KHushk patton si apni haalat

hawa ke rahm-o-karam pe hain hum

na hum ko rahon ka kuchh pata hai

na manzilon ki KHabar hai hum ko

kahan kahan hum liye phirenge

uThae is zindagi ka lasha

chalao nazron se tir hum par

hamein ajal ki ghiza bana do

chale bhi aao chale bhi aao