chali gain

rangīn ḳhvāb ban ke samātī chalī ga.iiñ

mad.hoshiyoñ ko aur baḌhātī chalī ga.iiñ

allah re shān-e-husn ki taslīm-e-shauq par

nazreñ uThā.e sar ko jhukātī chalī ga.iiñ

husn-e-jahāñ-panāh kī allāh re kashish

har ik nigah ko barq banātī chalī ga.iiñ

nīñdoñ meñ husn aur javānī kī karvaTeñ

ḳhvāboñ ke raaz raaz banātī chalī ga.iiñ

allah re ye naqāb ye husn-e-fusūñ-tarāz

pardoñ ke taar taar uḌātī chalī ga.iiñ

un ke jalāl-e-husn kā charchā hai har jagah

kal raat chāñd ko bhī jhukātī chalī ga.iiñ

aa.ī ho Thahro zīnat-e-bazm-e-makāñ bano

jhijkīñ rukīñ Thahar ke lajātī chalī ga.iiñ

allāh taab kaise maiñ lā.ūñ nigāh kī

rag rag ko jaise barq banātī chalī ga.iiñ

'sahbā'-asar nigāh hai har jumbish-e-nigāh

nazroñ se jām-e-mast pilātī chalī ga.iiñ

rangin KHwab ban ke samati chali gain

madhoshiyon ko aur baDhati chali gain

allah re shan-e-husn ki taslim-e-shauq par

nazren uThae sar ko jhukati chali gain

husn-e-jahan-panah ki allah re kashish

har ek nigah ko barq banati chali gain

nindon mein husn aur jawani ki karwaTen

KHwabon ke raaz raaz banati chali gain

allah re ye naqab ye husn-e-fusun-taraaz

pardon ke tar tar uDati chali gain

un ke jalal-e-husn ka charcha hai har jagah

kal raat chand ko bhi jhukati chali gain

aai ho Thahro zinat-e-bazm-e-makan bano

jhijkin rukin Thahar ke lajati chali gain

allah tab kaise main laun nigah ki

rag rag ko jaise barq banati chali gain

'sahba'-asar nigah hai har jumbish-e-nigah

nazron se jam-e-mast pilati chali gain