chalo wapas chalen

tumheñ ḳhvāhish ko chhūne kī tamannā hai

ḳhvāhisheñ to uḌtī-phirtī titliyāñ haiñ

Daak kī nākāra Ticketeñ to nahīñ haiñ

jinheñ album meñ rakh kar tum ye samjho

ki ye nāyāb chīzeñ ab tumhārī dastaras meñ haiñ

tumheñ sapne pakaḌne kī tamannā hai

nahīñ ye ġhair-mumkin hai

ki sapne an-chhue lamhoñ ke nāzuk aks haiñ

ārā.ishī beleñ nahīñ

jo kamre kī kisī dīvār par saj kar

tumhārī diid kā ehsāñ uThā.eñ

tumheñ kohre ke bhīge phuul chunñe kī tamannā hai

ye kohrā to charāġh-e-mausam-e-gul kā dhuāñ hai

koī dīvār-e-berlin par khiñchī tahrīr yā naqsha nahīñ

jise jis vaqt jo chāhe badal de

yā miTā de

sabz-rū kohrā pakaḌnā is qadar āsāñ nahīñ

suno

dīvāngī chhoḌo

chalo vāpas haqīqat meñ chaleñ

tumhein KHwahish ko chhune ki tamanna hai

KHwahishen to uDti-phirti titliyan hain

Dak ki nakara Ticketen to nahin hain

jinhen album mein rakh kar tum ye samjho

ki ye nayab chizen ab tumhaari dastaras mein hain

tumhein sapne pakaDne ki tamanna hai

nahin ye ghair-mumkin hai

ki sapne an-chhue lamhon ke nazuk aks hain

aaraishi belen nahin

jo kamre ki kisi diwar par saj kar

tumhaari did ka ehsan uThaen

tumhein kohre ke bhige phul chunne ki tamanna hai

ye kohra to charagh-e-mausam-e-gul ka dhuan hai

koi diwar-e-berlin par khinchi tahrir ya naqsha nahin

jise jis waqt jo chahe badal de

ya miTa de

sabz-ru kohra pakaDna is qadar aasan nahin

suno

diwangi chhoDo

chalo wapas haqiqat mein chalen