chalti phirti diwaren

kaun hai vo

kuchh nahīñ jānte

dekh sakte nahīñ

duniyā kī dīvāroñ meñ

chune hue patthar

kaun mere ḳhvāboñ meñ

āsmānoñ se utartā hai

jādū-zada logoñ ko

dīvāroñ se nikāl kar

zinda diloñ kī bastiyāñ ābād karnā chāhtā hai

magar ye log kaise haiñ

ba-zid haiñ

diloñ tak jaate raste band rakhne par

āñkhoñ zabānoñ aur dimāġhoñ ko

dīvāroñ meñ qaid rakhne par musir haiñ

meñ hairān huuñ

ki dīvāreñ bhī chaltī haiñ

kuchaltī jaatī haiñ

ra.ūnat se

sabhī ma.asūm jazboñ ko

kitāboñ se umaDtī raushnī ko

diloñ meñ nafrateñ bhar kar

uThā kar sar ye chalte haiñ

ra.ūnat se

sajā kar apne māthe par

nishāñ sajdoñ ke

sab se faḳhriya kahte haiñ

ham hī muttaqī haiñ aur zāhid haiñ

magar un kī qanā.at girya-zārī zohd-o-taqvā

dikhāvā hai banāvaT aur sajāvaT hai

ye jis ke naam par dhoke bāñTte phirte haiñ

masjidoñ aur bāzāroñ meñ

use sajdoñ se kyā matlab

use to dil basāne haiñ

aur is jādū-zada bastī ko jannat meñ badalnā hai

kaun hai wo

kuchh nahin jaante

dekh sakte nahin

duniya ki diwaron mein

chune hue patthar

kaun mere KHwabon mein

aasmanon se utarta hai

jadu-zada logon ko

diwaron se nikal kar

zinda dilon ki bastiyan aabaad karna chahta hai

magar ye log kaise hain

ba-zid hain

dilon tak jate raste band rakhne par

aankhon zabanon aur dimaghon ko

diwaron mein qaid rakhne par musir hain

mein hairan hun

ki diwaren bhi chalti hain

kuchalti jati hain

raunat se

sabhi masum jazbon ko

kitabon se umaDti raushni ko

dilon mein nafraten bhar kar

uTha kar sar ye chalte hain

raunat se

saja kar apne mathe par

nishan sajdon ke

sab se faKHriya kahte hain

hum hi muttaqi hain aur zahid hain

magar un ki qanaat girya-zari zohd-o-taqwa

dikhawa hai banawaT aur sajawaT hai

ye jis ke nam par dhoke banTte phirte hain

masjidon aur bazaron mein

use sajdon se kya matlab

use to dil basane hain

aur is jadu-zada basti ko jannat mein badalna hai