چناب ندی کا قصیدہ

سر شور, چناب اوتار مرے

مرے موہن ساگر سیارے

تری گھوکر جیون کا سرگم

تری لہر لہر برہم برہم

جب اتروں کھول کے پیراہن

ترے پانی گلے ملیں مجھ سے

تری ٹھنڈک سینے ساون کے

تری مہک محبت کی برکھا

ترے جل تھل جل تھل منظر سے

مری رانوں میں گدگدی سی ہو

مرے تلووں میں دو پھول کھلیں

مرے سوہن ساگر سیارے

مرے پاگل وحشی بنجارے

تو آہو سبز زمینوں کا

تو زائر پاک مدینوں کا

تو شاہد موج کے میلوں کا

تو شوخ مسافر بیلوں کا

تری چال میں مستی موروں سی

تری دہشت اتھرے ڈھوروں سی

مرے پاگل وحشی بنجارے

مرے موہن ساگر سیارے

تو کھلی کتاب عجائب کی

ترا ورق ورق طوفان لگے

تری کتھا میں رمزیں شہد بھری

تو نفس نفس انسان لگے

میں زرد کنارے کا پتھر

مرا بدن ببولوں کی ڈالی

مجھے امرت دے مجھے زہر پلا

مرا جسم ہے اندر سے خالی

مرے موہن ساگر سیارے

تو سبز کچور پہاڑی کے

برباد شوالوں کا وارث

بچھڑی ہوئی کونجوں کا مسکن

بھٹکے ہوئے بگلوں کا دریا

مرا موہن ساگر سیارا

مرا پاگل وحشی بنجارا

سر شور چناب اوتار ہے تو

اور یار عجب شہکار ہے تو