chand sawal

in 'aql ke bandoñ meñ āshufta-sarī kyoñ hai

ye tang-dilī kyoñ hai ye kam-nazarī kyoñ hai

asrār agar samjhe duniyā kī har ik shai ke

ḳhud apnī haqīqat se ye be-ḳhabarī kyoñ hai

sau jalve haiñ nazroñ se mānind-e-nazar pinhāñ

dā'vā-e-jahāñ-bīnī ai dīda-varī kyoñ hai

hal jin kā 'amal se hai paikār-o-jadal se hai

un zinda masā.il par baha-e-nazarī kyoñ hai

jo ḳhud kisī pahlū se kaasa hai gadā.ī kā

aise dar-e-daulat par daryūza-garī kyoñ hai

tū dekh tire dil meñ hai soz-e-talab kitnā

mat pūchh du'āoñ meñ ye be-asarī kyoñ hai

kyā nazr-e-qafas kar dī parvāz kī tāqat bhī

hāsil hai jab āzādī be-bāl-o-parī kyoñ hai

ai gul jo bahār aa.ī hai vaqt-e-ḳhud-ārā.ī

ye rang-e-junūñ kaisā ye jāma-darī kyoñ hai

vā'iz ko jo 'ādat hai pechīda-bayānī kī

hairāñ hai ki rindoñ kī har baat kharī kyoñ hai

hai kaun jo ye pūchhe us husn-e-ḳhud-ārā se

hai jab ki gurez itnā phir jalva-garī kyoñ hai

miltā hai ise paanī ashkoñ kī ravānī se

mā'lūm huā khetī zaḳhmoñ kī harī kyoñ hai

ulfat ko 'asad' kitnā āsān samajhtā thā

ab nāla-e-shab kyoñ hai āh-e-saharī kyoñ hai

in 'aql ke bandon mein aashufta-sari kyon hai

ye tang-dili kyon hai ye kam-nazari kyon hai

asrar agar samjhe duniya ki har ek shai ke

KHud apni haqiqat se ye be-KHabari kyon hai

sau jalwe hain nazron se manind-e-nazar pinhan

da'wa-e-jahan-bini ai dida-wari kyon hai

hal jin ka 'amal se hai paikar-o-jadal se hai

un zinda masail par baha-e-nazari kyon hai

jo KHud kisi pahlu se kasa hai gadai ka

aise dar-e-daulat par daryuza-gari kyon hai

tu dekh tere dil mein hai soz-e-talab kitna

mat puchh du'aon mein ye be-asari kyon hai

kya nazr-e-qafas kar di parwaz ki taqat bhi

hasil hai jab aazadi be-baal-o-pari kyon hai

ai gul jo bahaar aai hai waqt-e-KHud-arai

ye rang-e-junun kaisa ye jama-dari kyon hai

wa'iz ko jo 'adat hai pechida-bayani ki

hairan hai ki rindon ki har baat khari kyon hai

hai kaun jo ye puchhe us husn-e-KHud-ara se

hai jab ki gurez itna phir jalwa-gari kyon hai

milta hai ise pani ashkon ki rawani se

ma'lum hua kheti zaKHmon ki hari kyon hai

ulfat ko 'asad' kitna aasan samajhta tha

ab nala-e-shab kyon hai aah-e-sahari kyon hai