chand sawalat

maiñ ne chand savālāt gaThrī meñ bāñdhe aur

ḳhudā ko DhūñDne nikal paḌā

saaya ek vafādār sipāhī kī tarah

mere saath chal rahā thā

maiñ ne dekhā ki āsmān bārish se

nā-zebā bāteñ kartā hai

jis vajah se zamīn ab paanī kī

jagah ḳhuun chūstī hai

maiñ ne dekhā us naujavān ko jis ne

ḳhushiyāñ bech kar bulūġhat ḳharīdī aur

agle hī lamhe use qatl kar diyā gayā

maiñ ne dekhā ke log bhuul baiThe

ki ḳhudā to koī nahīñ

apne taḳhayyul se ek ḳhudā taḳhlīq kiyā

phir ḳhud se na.e qānūn banā.e

aur barahna soch se mukammal maz.habī zindagī jiine lage

maiñ ne dekhā ki log marne se pahle

dūsroñ kī zamīnoñ par apnī

qabreñ tayyār karvāne lage

taaki marne ke baad vahāñ qabza kiyā jā sake

maiñ ne dekhā un qabroñ meñ

zinda laḌkiyoñ ne panāh le lī

jin ke jismoñ ko bheḌiyoñ ne noch Daalā

jin kī chhātiyoñ se duudh kī jagah ḳhuun Tapkā

maiñ ne dekhā ke duniyā meñ

jahannum banā.ī ga.ī

aur us ke iftitāh ke liye taḳhayyul

vaale ḳhudā ko dāvat huī

maiñ ne dekhā logoñ ne barahna zehnoñ se

barahna ḳhvāb dekhe

phir un kī takmīl ke liye har koshisheñ kī

aur sochā kī ḳhudā ek soch ke

alāva kuchh nahīñ

merī gaThrī savāloñ se bhar kar zamīn par gir ga.ī

maiñ chīḳhā magar merī āvāz

mujh meñ qaid thī

maiñ ye sab dekh kar rail kī

paTrī par leT gayā

magar achānak ek ḳhaufnāk āvāz ne

mujhe pāgal kar diyā

vaqt ruk gayā sūraj kā rang surḳh paḌ gayā

pahāḌoñ ne zamīn se tang aa kar

āsmān kī taraf uḌnā shurūa kar diyā

samundaroñ ne shahroñ kā ruḳh kar liyā

maiñ ne ye manzar dekh kar āñkheñ band kar liiñ

main ne chand sawalat gaThri mein bandhe aur

KHuda ko DhunDne nikal paDa

saya ek wafadar sipahi ki tarah

mere sath chal raha tha

main ne dekha ki aasman barish se

na-zeba baaten karta hai

jis wajah se zamin ab pani ki

jagah KHun chusti hai

main ne dekha us naujawan ko jis ne

KHushiyan bech kar bulughat KHaridi aur

agle hi lamhe use qatl kar diya gaya

main ne dekha ke log bhul baiThe

ki KHuda to koi nahin

apne taKHayyul se ek KHuda taKHliq kiya

phir KHud se nae qanun banae

aur barahna soch se mukammal mazhabi zindagi jine lage

main ne dekha ki log marne se pahle

dusron ki zaminon par apni

qabren tayyar karwane lage

taki marne ke baad wahan qabza kiya ja sake

main ne dekha un qabron mein

zinda laDkiyon ne panah le li

jin ke jismon ko bheDiyon ne noch Dala

jin ki chhatiyon se dudh ki jagah KHun Tapka

main ne dekha ke duniya mein

jahannum banai gai

aur us ke iftitah ke liye taKHayyul

wale KHuda ko dawat hui

main ne dekha logon ne barahna zehnon se

barahna KHwab dekhe

phir un ki takmil ke liye har koshishen ki

aur socha ki KHuda ek soch ke

alawa kuchh nahin

meri gaThri sawalon se bhar kar zamin par gir gai

main chiKHa magar meri aawaz

mujh mein qaid thi

main ye sab dekh kar rail ki

paTri par leT gaya

magar achanak ek KHaufnak aawaz ne

mujhe pagal kar diya

waqt ruk gaya suraj ka rang surKH paD gaya

pahaDon ne zamin se tang aa kar

aasman ki taraf uDna shurua kar diya

samundaron ne shahron ka ruKH kar liya

main ne ye manzar dekh kar aankhen band kar lin