charagh-e-lamha

ye zindagī bhī ḳhudā kī ajiib ne.amat hai

jo saañs aatī hai sab se baḌī vo daulat hai

hayāt ik na.ī āvāz bhī hai raaz bhī hai

sahar ke giit ba-tadrīj gaa.e jaate haiñ

zabān miltī hai iz.hār-e-ārzū ke liye

mohabbatoñ ke tarāne sunā.e jaate haiñ

isī hayāt isī kār-gāh-e-hastī meñ

guzarte rahte haiñ ham sab musāfiroñ kī tarah

tasavvurāt-o-ḳhayālāt saath saath liye

barahna-pā.ī kī lazzat meñ jogiyoñ kī tarah

zamīñ kī ḳhaak haiñ ham ḳhāksār rahte haiñ

ye terā merā ye apne parā.e kuchh bhī nahīñ

ye zindagī to faqat mohlat-e-mohabbat hai

azal azal hai azal ke sivā.e kuchh bhī nahīñ

isī liye mire hamdard mere muḳhlis dost

charāġh-e-lamha ġhanīmat hai is ko jalne de

ise munāfa kā saudā samajh ke tū na parakh

jo lau ubhartī hai dil meñ use ubharne de

yahī vo lau he jo raushan dimāġh kartī hai

isī charāġh ko nūr-e-hayāt kahte haiñ

ḳhudā se bande ke rishte ko joḌtā hai ye nuur

ye rabt vo hai jise kā.enāt kahte haiñ

ye kā.enāt tasalsul sahar kā shaam kā hai

haqīqatoñ kā musalsal safar hai harakat meñ

safar kā manzil-e-āḳhir abad se jā milnā

khulā ye raaz ki ham haiñ kisī kī qudrat meñ

use talāsh kareñ aur usī ke ho jaa.eñ

ghanerī chhāñv jahāñ ho vahīñ pe kho jaa.eñ

ye zindagi bhi KHuda ki ajib neamat hai

jo sans aati hai sab se baDi wo daulat hai

hayat ek nai aawaz bhi hai raaz bhi hai

sahar ke git ba-tadrij gae jate hain

zaban milti hai izhaar-e-arzu ke liye

mohabbaton ke tarane sunae jate hain

isi hayat isi kar-gah-e-hasti mein

guzarte rahte hain hum sab musafiron ki tarah

tasawwuraat-o-KHayalat sath sath liye

barahna-pai ki lazzat mein jogiyon ki tarah

zamin ki KHak hain hum KHaksar rahte hain

ye tera mera ye apne parae kuchh bhi nahin

ye zindagi to faqat mohlat-e-mohabbat hai

azal azal hai azal ke siwae kuchh bhi nahin

isi liye mere hamdard mere muKHlis dost

charagh-e-lamha ghanimat hai is ko jalne de

ise munafa ka sauda samajh ke tu na parakh

jo lau ubharti hai dil mein use ubharne de

yahi wo lau he jo raushan dimagh karti hai

isi charagh ko nur-e-hayat kahte hain

KHuda se bande ke rishte ko joDta hai ye nur

ye rabt wo hai jise kaenat kahte hain

ye kaenat tasalsul sahar ka sham ka hai

haqiqaton ka musalsal safar hai harakat mein

safar ka manzil-e-aKHir abad se ja milna

khula ye raaz ki hum hain kisi ki qudrat mein

use talash karen aur usi ke ho jaen

ghaneri chhanw jahan ho wahin pe kho jaen