chashm-e-be-KHwab ko saman bahut

chashm-e-be-ḳhvāb ko sāmān bahut!

rāt-bhar shahr kī galiyoñ meñ havā

haath meñ sañg liye

ḳhauf se zard makānoñ ke dhaḌakte dil par

dastakeñ detī chalī jaatī hai

raushnī band kivāḌoñ se nikalte hue ghabrātī hai

har taraf chīḳh sī chakrātī hai

haiñ mire dil ke liye dard ke unvān bahut

dard kā naam samā.at ke liye rāhat-e-jāñ

dast-e-be-māya ko zar

nutq-e-ḳhāmosh ko lafz

ḳhvāb-e-be-dar ko makāñ

dard kā naam mire shahr-e-ḳhvāhish kā nishāñ

manzil-e-reg-e-ravāñ

dard kī raah pe taskīn ke imkān bahut!

hijr kā dard kaThin hai phir bhī

vo bhī us roz bichhaḌ kar mujh se

ḳhush to na thī

us ne ye manzil-e-ġham

kis tarah kaaTī hogī

vo bhī to merī tarah hogī pareshān bahut

(dard kī raah meñ taskīn ke sāmān bahut)

kyā ḳhabar us kī samā.at ke liye

dard kā naam bhalā ho ki na ho

shahr-e-ḳhvāhish kā nishāñ

nutq-e-ḳhāmosh kā iz.hār huā ho ki na ho

dast-e-be-māya kā zar (vo tahī-dast na thii)

hijr kā dard banā ho ki na ho

us kī galiyoñ meñ ravāñ dastakeñ detī huī surḳh havā ho ki na ho

ishq-e-nau-ḳhez ke armān bahut

shauq-e-gul-rañg ke raste meñ bayābān bahut

soḳhta-jān bahut

chashm-e-be-ḳhvāb ko sāmān bahut

chashm-e-be-KHwab ko saman bahut!

raat-bhar shahr ki galiyon mein hawa

hath mein sang liye

KHauf se zard makanon ke dhaDakte dil par

dastaken deti chali jati hai

raushni band kiwaDon se nikalte hue ghabraati hai

har taraf chiKH si chakraati hai

hain mere dil ke liye dard ke unwan bahut

dard ka nam samaat ke liye rahat-e-jaan

dast-e-be-maya ko zar

nutq-e-KHamosh ko lafz

KHwab-e-be-dar ko makan

dard ka nam mere shahr-e-KHwahish ka nishan

manzil-e-reg-e-rawan

dard ki rah pe taskin ke imkan bahut!

hijr ka dard kaThin hai phir bhi

wo bhi us roz bichhaD kar mujh se

KHush to na thi

us ne ye manzil-e-gham

kis tarah kaTi hogi

wo bhi to meri tarah hogi pareshan bahut

(dard ki rah mein taskin ke saman bahut)

kya KHabar us ki samaat ke liye

dard ka nam bhala ho ki na ho

shahr-e-KHwahish ka nishan

nutq-e-KHamosh ka izhaar hua ho ki na ho

dast-e-be-maya ka zar (wo tahi-dast na thi)

hijr ka dard bana ho ki na ho

us ki galiyon mein rawan dastaken deti hui surKH hawa ho ki na ho

ishq-e-nau-KHez ke arman bahut

shauq-e-gul-rang ke raste mein bayaban bahut

soKHta-jaan bahut

chashm-e-be-KHwab ko saman bahut