chashm-e-tamanna

chashm-e-tamannā

jise niiñd aa.ī thī sadiyoñ kī bīmāriyoñ kī thakan se

jaag uTThī hai shāyad

badan meñ nayā din shagūfe kī mānind ubhrā

shafaq-zār ban kar

dil kī āġhosh meñ aa basā hai

nazāre meñ mas.hūr rahne kī ḳhvāhish janam le rahī hai

basā kar use apnī nazroñ meñ

shādāb āñkhoñ meñ rahne ko jī chāhtā hai

vahī rañg-o-bū kī harārat kī halkī lakīreñ

tamāzat ke jhoñke badan chhū rahe haiñ

bahār aa ga.ī yaad kī vādiyoñ meñ

safar ke irādoñ se māyūs kashtī

kināre pe yuuñ aa lagī hai

ki Thahrī huī jhiil kī raushnī meñ nayā ghar basā hai

ye chashm-e-tamannā kī kashtī banī hai nayā āshiyāna

nīlgūñ raushnī tairtī hai

magar ye khaḌī hai

zamāne mohabbat ke phir lauT aa.e haiñ shāyad

vaqt ke Thahar jaane kī shāyad ghaḌī hai

qayāmat kaḌī hai

chashm-e-tamanna

jise nind aai thi sadiyon ki bimariyon ki thakan se

jag uTThi hai shayad

badan mein naya din shagufe ki manind ubhra

shafaq-zar ban kar

dil ki aaghosh mein aa basa hai

nazare mein mashur rahne ki KHwahish janam le rahi hai

basa kar use apni nazron mein

shadab aankhon mein rahne ko ji chahta hai

wahi rang-o-bu ki hararat ki halki lakiren

tamazat ke jhonke badan chhu rahe hain

bahaar aa gai yaad ki wadiyon mein

safar ke iradon se mayus kashti

kinare pe yun aa lagi hai

ki Thahri hui jhil ki raushni mein naya ghar basa hai

ye chashm-e-tamanna ki kashti bani hai naya aashiyana

nilgun raushni tairti hai

magar ye khaDi hai

zamane mohabbat ke phir lauT aae hain shayad

waqt ke Thahar jaane ki shayad ghaDi hai

qayamat kaDi hai