چوکور بندر کی چھلانگ

چوکور بندر کی چھلانگ سے سب حیرت میں پڑ گئے

دوسرے بندر تو چھلانگیں لگایا ہی کرتے تھے

لیکن کسی چوکور بندر نے آج تک چھلانگ نہیں لگائی تھی

سب نے یک زبان ہو کر کہا

چوکور بندر ہم سب میں افضل ہے

کیونکہ چھلانگ تو ہم سب لگا لیتے ہیں

لیکن وہ چوکور بھی ہے

اور ان میں سب ایک جو زیادہ سمجھ بوجھ رکھتا تھا بولا

کیا تم دیکھتے نہیں

کہ چوکور شکل ہی سب سے اچھی شکل ہے

کیونکہ اس میں چار پہلو ہوتے ہیں

جو چار جہتوں کی نشاندہی کرتے ہیں

اور چار زاویے ہوتے ہیں

جو چار موسموں کی علامت ہیں

اور سب نے کہا ہاں ایسا ہی ہے

تو پھر وہ سب چوکور بندر کے گرد جمع ہو گئے

اور دیر تک عقیدت سے اسے دیکھتے رہے