chehre ki gard

gāḌiyoñ ke bahāo meñ bahte hue shor kī gard

mere dhuāñ bante chehre pe jamne lagī hai

maiñ pahle hī jamte hue ḳhuun kī

galtī saḌtī huī

ḳhvāhishoñ kī karāhat se sāñsoñ kī qai

karne kī ek sa.i-e-musalsal meñ masrūf huuñ

merā dil titliyoñ kī rifāqat kī zid kar rahā hai

magar maiñ use haDDiyoñ se tane jaal se kaise bāhar nikālūñ

kaḌī āzmā.ish hai lekin

chalo muskurāne kī be-kār ḳhvāhish jagā.eñ

hañsī kā pyāla

chalo chehre kī jhurriyoñ meñ uñDeleñ

agar ham kisī tarah bhī hañs na paa.eñ

to ik dūsre ke ġhalāzat bhare chehre ko noch Dāleñ

agar ham se ye bhī na ho paa.e to ro hī leñ

shāyad is tarah ham

apne gāloñ pe jamtī huī

gard kī tah ko dho leñ

gaDiyon ke bahao mein bahte hue shor ki gard

mere dhuan bante chehre pe jamne lagi hai

main pahle hi jamte hue KHun ki

galti saDti hui

KHwahishon ki karahat se sanson ki qai

karne ki ek sai-e-musalsal mein masruf hun

mera dil titliyon ki rifaqat ki zid kar raha hai

magar main use haDDiyon se tane jal se kaise bahar nikalun

kaDi aazmaish hai lekin

chalo muskurane ki be-kar KHwahish jagaen

hansi ka pyala

chalo chehre ki jhurriyon mein unDelen

agar hum kisi tarah bhi hans na paen

to ek dusre ke ghalazat bhare chehre ko noch Dalen

agar hum se ye bhi na ho pae to ro hi len

shayad is tarah hum

apne galon pe jamti hui

gard ki tah ko dho len