chhalawa

bikhrā sapnā pal meñ apnā qismat ne kyā khel dikhāyā

buuñd na jal kī ik bhī barsī nāhaq chhat par bādal aayā

kaahe dil ke vīrāne meñ chāhat kā ik ankur phūTā

jhoñkā ek havā kā aayā pal meñ ukhḌā jaḌ se buuTā

saayā thā jo haath na aayā jaanā jis ko manzil maiñ ne

tūfānoñ kā markaz thā vo samjhā jis ko sāhil maiñ ne

phir se ujḌī dil kī bastī aur huī jag meñ rusvā.ī

phir se kosā mūrakh man ko kaahe jhūTī aas lagā.ī

aas kā diip jalā kar dil meñ chhoḌ gayā mujh ko harjā.ī

vo to ek chhalāvā thā bas maiñ bad-qismat buujh na paa.ī

bikhra sapna pal mein apna qismat ne kya khel dikhaya

bund na jal ki ek bhi barsi nahaq chhat par baadal aaya

kahe dil ke virane mein chahat ka ek ankur phuTa

jhonka ek hawa ka aaya pal mein ukhDa jaD se buTa

saya tha jo hath na aaya jaana jis ko manzil main ne

tufanon ka markaz tha wo samjha jis ko sahil main ne

phir se ujDi dil ki basti aur hui jag mein ruswai

phir se kosa murakh man ko kahe jhuTi aas lagai

aas ka dip jala kar dil mein chhoD gaya mujh ko harjai

wo to ek chhalawa tha bas main bad-qismat bujh na pai