chizon ke andar jhankne ki koshish

maiñ ne ek sūkhte peḌ par

nazm likhnā shurūa kī

mere andar piile pattoñ ke Dher lag ga.e

maiñ ne havā par nazm likhī

mere andar shāḳheñ phūTne lagīñ

phuul merī hatheliyoñ se

bāhar nikal aa.e

maiñ ne bārish par nazm likhī

merī chādar ke pallū bhiig ga.e

jin ko sukhāne ke liye

maiñ ne

dhuup par nazm likhī

sūraj savā neze par aa gayā

peḌ jalne lage

aur parind marne lage

maiñ ne bādaloñ ke liye haath uThā.e

phir kashtiyāñ kam paḌ ga.iiñ

log Dūbne lage

maiñ ne Dūbne vāloñ par nazm likhnā chāhī

lāsheñ hī lāsheñ merī chāroñ jānib tairne lagīñ

har ek laash kahne lagī

pahle mujh par likho

pahle mujh par

maiñ ne is shor meñ

apnī bhī chīḳheñ sunīñ

phir mere andar

ek gahre aur pur-asrār sukūt ne baserā kar liyā

ab maiñ is sukūt kī mezbānī kartī huuñ

isī ke saath bāteñ kartī huuñ

sotī aur jāgtī huuñ

dīvāreñ mere liye

libās bantī rahtī haiñ

khiḌkiyāñ aur raushan-dān mere vajūd ke ghaav haiñ

jin par

har aatī huī sub.h aur Dhaltī huī shaam

apnā apnā marham rakhtī haiñ

aur mujh se kahtī haiñ ham par bhī nazm likhnā jab ye ghaav bhar jaa.eñ

galī meñ khelte bachche

kabhī kabhī

khiḌkī ke shīshe se āñkheñ chipkā kar

andar jhāñkne kī koshish karte haiñ

unheñ kaun ye samjhā.e

chīzoñ ke andar jhāñkne kī koshish

shā.ir banā detī hai

main ne ek sukhte peD par

nazm likhna shurua ki

mere andar pile patton ke Dher lag gae

main ne hawa par nazm likhi

mere andar shaKHen phuTne lagin

phul meri hatheliyon se

bahar nikal aae

main ne barish par nazm likhi

meri chadar ke pallu bhig gae

jin ko sukhane ke liye

main ne

dhup par nazm likhi

suraj sawa neze par aa gaya

peD jalne lage

aur parind marne lage

main ne baadalon ke liye hath uThae

phir kashtiyan kam paD gain

log Dubne lage

main ne Dubne walon par nazm likhna chahi

lashen hi lashen meri chaaron jaanib tairne lagin

har ek lash kahne lagi

pahle mujh par likho

pahle mujh par

main ne is shor mein

apni bhi chiKHen sunin

phir mere andar

ek gahre aur pur-asrar sukut ne basera kar liya

ab main is sukut ki mezbani karti hun

isi ke sath baaten karti hun

soti aur jagti hun

diwaren mere liye

libas banti rahti hain

khiDkiyan aur raushan-dan mere wajud ke ghaw hain

jin par

har aati hui subh aur Dhalti hui sham

apna apna marham rakhti hain

aur mujh se kahti hain hum par bhi nazm likhna jab ye ghaw bhar jaen

gali mein khelte bachche

kabhi kabhi

khiDki ke shishe se aankhen chipka kar

andar jhankne ki koshish karte hain

unhen kaun ye samjhae

chizon ke andar jhankne ki koshish

shair bana deti hai